By Rey Anthony Chiu | 08:30 PM November 29, 2023
Taliwala sa kontrobersiya nga naangkon sa Sangguniang Kabataan (SK) dala sa pagluwat sa katungdanan sa usa ka Vice Chairman sa SK sa usa ka lungsod tungod sa giingon nga ngil-ag nga pinalitay sa boto, napili na ang mga bag-o nga opisyales sa SK Provincial federation alang sa mga tuig 2023-2025.
Bag-ong Presidente sa SK sa Bohol mao si Lawrence Xavier Ancla nga SK Federated Chairman sa Loon. Siya usa graduate sa Bachelor of Science in Interdisplinary Business Studies sa De La Salle University Manila ug presidente sa Stelcare Pharma.
Si Jessa Marie Caberte ang SK Federated Chair sa Sevilla maoy Bise Presidente.
Ang bag-ong Secretaryo mao si Hans Laurence Sayon, SK Federation President sa Bien Unido ug ang Mamahandi mao si Marianne Daphne Tare sa Dauis SK.
Auditor usab ang napili nga SK Federated President sa Loay nga so Emmanuel Piquero samtang ang Press Relations Officer sa kapunungan mao si Ruffa Mae Atillo sa Sagbayan SK.
Napili usab nga Sgt-at-Arms ang SK Federation chairman sa Panglao, si Renel Ryan Mila.
Segun pa sa kasayuran gikan sa Sangguniang Panlalawigan, walay mipatim-aw nga mga mi-kontra sa mga nahisgutang mga posisyon, ug gani, bisan ang pagpahiluna sa Election Committee nga maoy nadumala sa piniliay sa pederasyon, naporma usab nga wala nay kiyawkiyaw pa.
Nunot niini, si Ancla, molingkod na isip ex officio member sa SP sa Bohol ug mao nay isipon nga opisyal nga representante ug magdala sa tingog sa kabataan sa Bohol. (PIAbohol)
