BOHOL WEATHER

Bohol Island News

Your source of reliable news and content in the island.

Hangin sa Cebu limpyo- DENR

Nagpabilin nga limpyo ang hangin dinhi sa Metro Cebu area, sigon pa sa kadagkuan sa Department of Environment and Natural Resources kon DENR ug Environmental Management Bureau kon EMB dinhi sa Rehiyon Siyete. Gihulagway ni EMB-7 Director William Cunado nga “very good” ang hangin nga gihanggap sa mga Sugbuanon nga nagpuyo sa Metro Cebu area.

Mga kadagkuan sa DENR-7 ang miatubang sa mga sakop sa media aron moistorya kabahin sa pag-obserbar sa World Environment Month. Contributed Photo

Gipasabot ni DENR-7 Regional Executive Director Gilbert Gonzales nga sa sud sa lima ka tuig nilang monitoring, maayo ang kalidad sa hangin dinhi bisan pa man sa limitado nilang mga ekipo. Apan iyang kabalaka nga posible kining mausab tungod sa pagdaghan na karon ang nagdagan ug ingon man nanag-iya og mga sakyanan.

Base sa datos sa EMB-7 sa tuig 2015, numero unong kontributor sa polusyon sa hangin mao ang mga aso nga mogawas sa tambotso sa mga sakyanan. Subay niini miawhag si Gonzales sa mga magbabalaod nga unta tan-awon kung unsaon pag-regulate niining pagpanag-iya og sakyanan.

Matod niya nga bisan pa man og aduna’y balaod ubos sa Clean Air Act nga nag-regulate sa mga emissions sa mga sakyanan, mas maayong mabutangan usab og balaod aron mapaminusan ang gidaghanon sa mga nagdagan nga sakyanan.

Giawhag sa Mines and Geosciences Bureau kon MGB dinhi sa Rehiyon Siyete ang mga bag-ong napili ug molingkod nga mga opisyales nga gamiton ang ilang mga gipang-apod apod nga geohazard maps isip kabahin sa ilang local disaster management plans. Kini ang awhag ni MGB-7 Director Efren Carido karon nga nagsingabot na ang panahon sa ting-uwan. Gitataw ni Carido nga ang nahitabong dakong landslide sa nakalabayng tuig sa dakbayan sa Naga, ang usa sa nakapahigmata sa mga lokal nga opisyales aron hatagan kini og importansiya.

Gani aduna na’y nadawat nga requests ang ilang buhatan aron mopahigayon og geological assessments sa mga lungsod ug siyudad sa Sugbo aron matino ang mga lugar nga aduna’y dakong posibilidad nga maapektohan sa pagbaha o di ba kaha pagdahili sa yuta. Giangkon ni Carido nga limitado kaayo ang ilang personnel nga mohimo niini. Mao nga iyang awhag nga gamiton usa isip basehanan ang ilang gipanghatag nga geohazard maps nga anaa sa 10,000 scale aron magamit sa ilang pagplano.

Samtang, nagpadayon pa gihapon ang gihimong rehabilitasyon sa Sitio Sindulan diin nahitabo ang dakong landslide sa dakbayan sa Naga. Matod ni Carido nga gipaabot mga mahuman na ang Phase 1 sa Hazard Reduction Plan (HRP) sa Apo Land and Quarry Corporation (ALQC) karon buwana.

Lakip sa nahuman na og trabaho ubos sa maong plano mao ang pag-clearing sa debris sa Pangdan River ug paggama sa drainage system sa sud sa planta.

Padayon pa gihapon ang pagtrabaho aron mahuman ang Sindulan Safety Wall ug mananom pa usab og mga kawayan sa gilid sa Pangdan River aron usab mao kini ang mopugong sa tubig kung aduna unya’y dakong pagbaha.

Giisip nga usa ka natural nga phenomenon ang nahitabo sa Sitio Sindulan. Subay niini, nahibalik na ang mga giparelibuhan nga opisyales sa MGB-7 tungod sa nahitabo.

Matod ni Carido nga nahibalik na sa ilang mga trabaho ang maong mga opisyales ug wala kini mapahamtangi og silot.

Leave a Reply

This site uses Akismet to reduce spam. Learn how your comment data is processed.

%d bloggers like this: