By PIA-Bohol | 07:19 PM January 28, 2025
Bukas na ang 24 oras sa pito ka adlaw nga helpline, Bohol Konek, Bohol Kolek ug Bohol Korek apil na ang Bohol Update aron ipadayag sa bag-ong dagway sa nahalin na nga Bohol Light Company Incorporated (BLCI) ngadto na sa Bohol Light.
Kini maoy unod sa mga nahauna nga kabag-ohan nga gisagop sa kompanyang BoholLight alang sa mga konsumidor niini sa Tagbilaran City.
Matud pa ni Roel Z. Castro, Chief Operations Officer ug Presidente sa BoholLight, nga sama sa ubang lugar nga ilang giserbisyohan, dako og gikatabang ang pagpaila-ila sa bag-ong kompanya ug ang matang sa di higtupngan nga serbisyo niini pinaagi sa pagbukas sa online ug on call nga 24/7 helpline.
Kahinumduman nga ang BLCI, us aka kompanya nga pribado na human ang kagamhanang probinsyal mibaligya sa majority shares niini nga 70% ngadto sa Salcon Power, samtang 30% na lamang ang gipanag-iya sa Bohol.
Kini dala sa matud pa, kawalay kabang-kaagan sa kagamhanan sa pagdumala sa utilities nga dili mahimong langanon ang serbisyo kon makasinati na og pagpangaguba ug pagpaayo niini.
Gawas pa, lisud aghaton ang mga empleyado nga nanarbaho niini sa pagtukaw kon may serbisyo nga madaut ug may kinahanglang ayohon.
Sa bag-ong kompanya nga may 30% gihapon nga katungod ang lalawigan, buot na niini nga ikapadayag ang bag-ong dagway sa BoholLight, matud ni Castro.
Kon kaniadto, langan kay daghan og kiyawkiyaw ang pagpataud og suga ug koryente, uak ka online help program sa bag-ong Bohol Light and BoholKonek.
Ang Bohol Konek magpasayon sa pagpang-aplay aron matauran og koryente sa balay, ug gipamubo na gani niini ang proseso aron sa usa ka bisitahan sa buhatan, solbad na ang panginahanglan.
Gipailaila usab ang BoholKolek, ang sistema sa pagpangolekta sa mga bayranan nga matud pa sa BoholLight, mahimong dili na moadto pa sa ilang buhatan aron mobayad.
Piot ug dyutay ra ang lugar nga kapundohan sa BoholLight ug dili maayo alang sa tanan nga magpundo ug magpaabut kay pwede ra nga bayaran ang bills sa EZPay, GCAsh ug sa ilang collecting partners sama sa mga bangko.
Alang sa mga depektoso og metro, may kaugalingon nga meter repair laboratory ang BoholLight aron maseguro ang calibration sa mga metro ug walay tikas ang paggamit sa koryente, dayag ni Castro.
Kini ang BoholKorek, diin maseguro nga walay natikasan, u gang mga proseso ug gipaningil, subay sa gitugot sa balaod.
Ibabaw niining tanan, anaa ang BoholUpdate, ang pasilidad sa pag-update sa mga sakop sa balay nga may koryente, ang pagtumbok sa mga sakop, aron pagseguro nga nag mga bills, adto ipadala sa saktong mga tag-iya sa giserbisyohan.
Gipatuman na usab sa BoholLight sa Tagbilaran ang paggamit sa state of the art nga sistema sa SCADA, us aka sistema sa mga element sa software ug hardware nga magtugot sa linawas nga pagkontrolar ug pagmonitor sa mga proseso gamit ang computer aron, sa labing bag-ong katikaran sa gawas sa buhatan, mapahimutang dayon ang labing haum nga desisyon nga angayan buhaton ganit ang real-time data.
Niini, matud sa BoholLight, kon may poste nga adunay nahitabo nga pagkasunog, makit-an dayun sa sistema ug mapawong dayun nga dili na maka-angin pa sa uban nga linya ug mapamaayo ang serbisyo. (PIABohol)
