By PR | 09:17 PM April 13, 2023
Malampuson ang gihimong launching ceremony sa Governor’s Cup 2023 niadtong adlaw’ng Martes, Abril 11, sa Ceremonial Hall, New Provincial Capitol.
Kini gitambongan sa tanang mga local chief executives, sa matag lungsod isip suporta sa ilang tagsa-tagsa ka team ug sa maong kalihukan.
Maanyag ang mga hulagway sa mga muse sa matag team. Matag usa kanila, kandidata sa ipahigayon nga Search for Miss Governor’s Cup 2023, usa kini ka back-to-back nga event niining maong PGBh D-League Governor’s Cup.
Unang mibuhi sa iyang solidarity message ang LMP President nga si Buena Vista Mayor Dave Duallo human sa mainitong pag abi-abi ni Bise Gobernador Dionisio Victor Balite sa mga bisita. Gipaabot ni Duallo ang iyang pahalipay ngadto sa gobernador sa pagpahigayon niining Governor’s Cup kay unang higayon kini sa lalawigan.
Mihatag usab sa mensahe si 1st District Rep. Edgar Chatto. Namahayag siya sa iyang suporta ug pahalipay sa Kagamhanang Probinsyal ubos sa liderato ni Aumentado sa malampusong kalihukan. Girepresentahan sa ilang chiefs of staff ai 2nd District Rep. nga si Vanvan Aumentado ug 3rd District Rep. Alexie Tutor.
Ang Governor’s Cup nakabaton sa katumanan pinaagi sa pagtambayayong sa Local Government Affairs (LGA), Provincial Youth Development Office (PYDO), uban sa pag-alayon sa Special Projects Section (SPS), Provincial Information and Media Office (PIMO) ug Creatives Section.
Ang mga District Commissioners gilangkob nila ni Peter Naron, Lenard Simbit, Undo Zamora, Lincoln Gequillana, Doy Ligan ug Joseph Namor ug Leo Sucio.
Highlighted sa maong kalihukan ang Unveiling of Governor’s Cup 2023 logo, ang pagpresentar sa mga maanyag nga muse sa matag teams ug ang mensahe ni Aumentado.
Ang mensahe sa gobernador nagtumong sa iyang seryoso ug malipayong pagpasalamat sa bug-os nga suporta sa mga mayor sa tibuok Bohol niini nga kalihukan.
Gipahibalo ni Aumentado nga ang overall champion sa Governor’s Cup, gitagan-an sa P10M nga kantidad sa proyekto alang sa lungsod, ang makakuha sa ikaduhang ganti, adunay P7M nga kantidad sa proyekto ug ang ikatulo adunay P4M nga kantidad sa proyekto.
Ang Governor’s Cup Launching nahimong mas mabulukon sa dihang mirampa na ang mga maanyag nga muse sa matag teams.
Pagahimoon ang opening sa Third District karong April 16 didto sa Candijay, ang First District April 21didto sa Calape ug April 23 ang Second District didto sa Talibon. Matod pa nga syento porsyento ang suporta sa mga mayor sa Governor’s Cup nga gipasiugdahan sa Gobernador. Nagkahiusa ang mga opisyales sa ilang tinguha pagpauswag sa Bohol sa natad sa sports.
