Ayaw kalimti ang rason og nganong aduna ta’y gitagamtam nga kagawasan karon. Mao kini ang sentro sa mensahe ni Department of Education kon DepEd Secretary Leonor Briones sa iyang nahimong speech sa selebrasyon sa ika-syento baynte uno ka tuig nga Pagdeklara sa Kagawasan sa nasud.
Matod niya, dili kini karon matagamtaman sa kasamtangang henerasyon kon dili pa sa sakripisyo nga gihimo sa mga bayani ilabi na ang mga lokal nga bayani nga nanguna sa rebolusyon batok sa mga langyaw kaniadto sa mga lalawigan.
Partikular nga gihisgot ni Briones si Datu Lapu-Lapu nga giila ni Presidente Duterte isip pinakaunang bayanin Pilipino nga nakigbatok sa mga langyaw nga mananakop nga nahiabot dinhi sa Sugbo.
“Hinumduman ang giagian ni Lapu-Lapu and sa atong mga bayani. Aduna kitay development, asenso. Kini tanan ato gi-enjoy tungod kanila. Dili nato malimtan ilang binuhatan. Dili hikalimtan ang hero nga Bisaya,” matod ni Briones.
Gawas niini gipasidunggan usab ni Briones sa iyang speech ang lain pa nga mga bayani nga naila dinhi sa Central Visayas nga naglakip nila ni Leon Kilat, Arcadio Maxilom, Juan Climaco, Gat Tamblot, ug si Francisco Sindrejas o mas naila nga si “Dagohoy”.
Si Briones ang nahimong guest of honor and speaker sa gipahigayong national celebration sa Liberty Shrine sa dakbayan sa Lapu-Lapu. Kini gipahigayon atubangan mismo sa monumento ni Datu Lapu-Lapu.
Ang maong selebrasyon subay na usab sa pagtimaan sa gihimong pagbatok usab sa maong bayani sa pag-abot ug tumong nga pagsakop sa mga langyaw nga Espanyol dinhi sa Sugbo nga pinangulohan ni Ferdinand Magellan.
Matod ni Dr. Rene Escalante, ang chairman of the board sa National Historical Commission of the Philippines kon NHCP, nga sugod karon subsob na ilang preparasyon para usab sa maong kasaulogan nga ipahigayon sa tuig 2021.
Samtang, aduna usab gitanyag nga 11,000 ka mga trabaho ang Department of Labor and Employment kon DOLE dinhi sa Rehiyon Siyete alang sa ilang Independence Day Job Fair.
Tulo ang site nga gipahigayonan niini sa Central Visayas. Usa na niini ang Hoops Dome sa dakbayan sa Lapu-Lapu diin adunay 7,000 ka mga trabaho sa lokal ug overseas ang gitanyag.
Ang lain duha ka sites sa job fair anaa sa Lamberto Macias Sports and Cultural Center sa dakbayan sa Dumaguete, Negros Oriental ug ang lalawigan sa Bohol.
Gidala usab sa maong kalihukan ang Diskwento Caravan sa Department of Trade and Industry dinhi sa Rehiyon Siyete (DTI-7) diin mga discounted nga school supplies ug ubang goods ang ilang gipamaligya.
