By PR | 08:06 PM November 28, 2023
Malipayon nga gidawat sa mga kabataan ang kantidad P10,000 nga gitunol ni Gobernador Aris Aumentado ngadto kanila isip dugang papremyo sa ilang mga kalikuhan atol sa gipahigayon nga Bohol Children’s Summit niadtong Nobyembre 27 didto sa Ceremonial Hall New Capitol ning dakbayan.
Gilusad ang maong summit agi og pagsaulog sa National Children’s Month, ang Office of the Provincial Social Welfare and Development (OPSWD) pinanguluhan ni Mita Tecson.
Giabiabi ni Tecson ang mga nitambong, pinaagi sa usa ka mensahe.
Ubos sa tema nga “Healthy, nourished, sheltered: Ensuring the right to life for all!”, gitambungan ang kalihukan sa 70 ka mga kabataan sa nagkadaiyang mga local government units (LGUs), 65 ka mga escorts sa kabataan, ug 31 ka mga representante sa mga LGUs nga kasagaran Municipal Social Welfare and Development officers ug DepEd personnel.
Si Aumentado nihatag sa State of the Children’s Address diin ang maong mensahe nagtumong sa pagsiguro nga mahatag ngadto sa mga kabataan ang maayo nga pag-atiman sa ilang kahimtang ug pagpanalipod sa ilang mga katungod.
Gipasalamatan sa gobernador ang kinatibuk-an sa OPSWD, ingon man ang mga dinapit nga mamumulong lakip na si Dr. Anne Mariquit Oppus, GAD Focal Person sa lalawigan, manlalaban Adolfo Doroy uban ni PEMS Melinda Basalo, mga sakop sa Provincial Council For the Protection of Children, Donna Belle Mante, hepe sa PCIS ug tanan nga nahimong kabahin sa malampuson nga kalihukan.
Nalingaw ang mga kabataan ilabina sa ilang workshop. Gipahigayon usab ang piniliay tali sa mga kabataan aron dunay mga opisyales nga mudumala sa ilang kapunungan.
Kalambigit sa summit ang mga accredited nga NGO sama sa End Child Prostitution and Trafficking (ECPAT) ug World Vision. Ang World Vision naghatag sa mga kabataan og mga premyo nga nagdugang sa kasadya sa programa.
Giaghat ni Aumentado ang tanan sa padayon pagtinabangay aron makab-ot ang gitinguha nga kalambuan sa komunidad. ALT/ PIMO
