By PR| 08:31 PM October 18, 2024
Ang mga residente sa Dakbayan sa Tagbilaran makasinati og P3.81 nga pagkunhod sa kinatibuk-ang rate sa kuryente karong Oktubre 2024, kumpara sa billing sa Setyembre.
Ang Bohol Light Company Inc, nga gipadagan na karon ubos sa Primelectric, miingon nga sa Oktubre 2024, ang mga residential nga konsumidor sa Tagbilaran City magabayad na lang og P9.81 kada kWh, gikan sa P13.62 sa miaging bulan.
Samtang, ang mga komersyal nga konsumidor mahimo nang P9.54 kada kWh, gikan sa P13.26/kWh. Ang pagka-ubos sa presyo sa kuryente tungod sa pagkunhod usab sa presyo diha sa Wholesale Electricity Spot Market (WESM), nga adunay dakong epekto sa pagkwenta sa Power Generation Cost.
Ang mga rate sa Generation ug Transmission mga “pass-through” nga mga bayranan, nga gi-bill sa mga power generator ug sa National Grid Corporation of the Philippines (NGCP) ngadto sa Bohol Light. Kini nga mga bayranan ipasa sa mga konsumidor ug e-remit ra usab ug pagbalik ngadto sa mga suplayer sa kuryente ug sa NGCP.
Ang Generation Charge sa kuryente matag bulan mag usab-usab tungod kay magdepende kini kung pila ang presyo sa pagkompra sa mga raw materials sa mga Power Generation Plant aron makahimo ug enerhiya, dili ma tyansa nga presyo diha sa Wholesale Electricity Spot Market (WESM) ug sa Transmission Charges. Mao kini ang mga hinungdan nga sa matag bulan adunay mga adjustments ang singil sa kuryente nga ipatuman sa mga Distribution Utilities, sama sa Bohol Light.
Ang distribution rate gilangkub sa Distribution, Supply and Metering (DSM) charges nga nagkantidad lamang ug P0.9840/kwh nga sukad pa kaniadtong tuig 2015. . Ang maong kantidad fixed ug dili basta-bastang madugangan. Nagkinahanglan kini ug pormal nga applikasyon ug pagtugot gikan sa Energy Regulatory Commission (ERC).
Mao lamang kini ang masulod diha sa panudlanan sa sa Bohol Light nga maoy magamit alang sa administrative, operation ug maintenance expenses.
