Gihuwat na lang sa Department of Health kon DOH dinhi sa Rehiyon Siyete nga hingpit nang ilibkas sa ulohang buhatan niini ang deklarasyon sa outbreak sa measles sa tibook nasud.
Si DOH-7 Director Jaime Bernadas nibutyag nga natapos na ang ilang gihimong outbreak response ug may duha ka semana na nga ilang na-monitor nga gamay na lang ang adunay nadugang nga kaso sa tipdas dinhi sa rehiyon.
Base sa datos sa DOH-7, adunay 1,895 ka kaso sa tipdas dinhi gikan Enero hangtod Hunyo 8 karong tuiga. Adunay 14 nga natala nga namatay na gikan niini. Kini 754 porsyento nga taas kon itandi sa nakalabayng tuig nga aduna lay natala nga 222 ka kaso ug usa ang namatay.
Nag-una sa gidaghanon sa kaso ang dakbayan sa Lapu-Lapu (496 ka kaso); dakbayan sa Sugbo (135); dakbayan sa Talisay (105); dakbayan sa Mandaue (73); ug dakbayan sa Toledo (47).
Gipasabot ni Bernadas nga kasamtangan pa silang nagpahigayon og mapping aron masuta ang mga lugar nga aduna pa’y mga wala mahatagi sa bakuna sa tipdas.
Hingpit nang natapos ang ilang outbreak immunization response niadtong Samtang, si DOH-7 Assistant Regional Director Elenietta Gamolo nitug-an sa mga tigbalita nga mopahigayon sila og school-based immunization.
“We want to ensure that these school children nga dili magkasakit sa measles. Atong ma-cut off ang transmission,” dugang ni Gamolo.
Kini subay sa ilang pagkab-ot sa target nga 95 porsyento ang mahatagan og bakuna batok niini sa dili pa matapos ang buwan as Hunyo.
Ang screening ipahigayon sa mga tunghaan diin tan-awon kung si kinsa pa ang wala mahatagan sa maong bakuna.
