Aduna’y gipang-apod apod nga mga kurtina sa mga tunghaan nga gitino sa mga rural health units (RHUs) nga aduna’y taas nga kaso sa dengue sa ilang barangay nga nahisakupan.
Matod ni Ma. Michelle Acosta, senior health program officer sa Department of Health dinhi sa Central Visayas (DOH-7), nga ang maong mga kurtina aduna’y sagol nga kemikal nga mopakgang sa mga lamok nga gadala og dengue virus ug uban pang mga insekto.
Gitug-an ni Acosta nga kini safe ra man nga gamiton og wala’y ngil-ad nga epekto sa mga estudyante. Naa sa 7,500 rolls ang gihatag sa Central Visayas diin 10 ka rolls ang nadawat sa matag RHU. Ang usa ka roll equivalent sa 20 ka metros nga kurtina.
Molungtad og hangtod sa lima ka tuig ang kemikal nga naa sa kurtina. Gawas sa mga tunghaan, aduna usab mga ipanghatag niining mga kemikal sa mga RHU aron nga pag-awhag sa mga mulopyo sa barangay nga dalhon ang ilang kurtina og didto ihumol kini.
Bisan pa man og nagpromote sila sa paggamit sa mga kemikal batok sa dengue, gitataw ni Acosta nga dili gyud abusohon ang paggamit niini.
“Search and destroy gyud ta,” dugang ni Acosta.
Ang pagpanghatag sa maong mga kurtina sa mga tunghaan nagsugod niadtong pagpahigayon sa Brigada Eskwela. Base sa labing ulahing datos sa DOH-7, doble ang gidaghanon nga nakitang pagsaka sa kaso sa dengue ilabi na dinhi sa dakbayan sa Sugbo gikan Enero hangtod karon Hunyo 8 karong tuiga.
Aduna’y natala nga 1,162 ka kaso kon itandi sa 592 ka kaso sa tuig 2018. Doble usab ang gidaghanon sa namatay.
Gikan sa upat sa tuig 2018, niabot na og walo karon tuiga.
Sa tibook rehiyon, aduna na’y 7,996 ka kaso diin 50 na ang namatay. Kini 198 porsyento ang gitas-on kung ikompara sa 2018 nga adunay natala nga 2,683 ka kaso ug 21 ang namatay. Gawas sa dakbayan sa Sugbo, nisunod ang dakbayan sa Lapu-Lapu (568 ka kaso); Mandaue (377); Dumaguete (251); Danao (230); ug lungsod sa Buenavista (199).
