By PR | 07:53 PM July 13, 2023
Ang Kagamhanang Probinsiyal sa Bohol (PGBh), ubos sa pagpangulo ni Gobernador Aris Aumentado, nipahigayon ug pagpang-apod-apod sa Rice Competitiveness Enhancement Fund gikan sa Department of Agriculture (DA) karung adlawa, Huwebes, Hulyo 13, 2023, didto sa Guindulman Gymnasium, Barangay Poblacion sa Guindulman.
Si Executive Assistant Nunila Pinat maoy mingtabang sa pagpanghatag sa Rice Farmers Financial Assistance (RFFA) ngadto sa 2,432 ka mga mag-uuma gikan sa lima ka lungsod nga naglangkob sa 1,248 ka mga rice farmers sa Guindulman, 531 sa Alicia, 498 sa Mabini, 83 sa Duero, ug 72 sa Anda.
Ang matag usa ka mag-uuma nakadawat og P5,000 nga ayuda isip abag ngadto kanila gikan sa panggamhanan alang sa pagpatuman sa rice tariffication o pagtugot sa dugang nga importasyon sa bugas.
Mahinuduman nga niadtong Martes, Hulyo 11, 2023, mipahigayon usab ang Kagamhanang Probinsyal ug distribution sa maong samang assistance alang sa 2,025 ka mga mag-uuma gikan sa lungsod sa Dimiao, Lila, ug sa host municipality sa Valencia.
Ang Kagamhanang Probinsyal komitado sa pagsuporta sa lokal nga mga mag-uuma, kinsa mao ang mga economic drivers sa UNESCO Global Geopark sa islang lalawigan sa Bohol, tumong ang pag-implementar og climate-smart agriculture ubos sa Strategic Change Agenda sa administrasyong Aumentado-Balite. (PIMO/JSS)
