By PIMO | 07:44 PM July 13, 2023
Giabiabi nila ni Gobernador Aris Aumentado ug Bise Gobernador Dionisio Victor Balite ang mga bisita gikan sa Embahada sa Estados Unidos, partikular sa U.S. Department of Agriculture (USDA) nga pinagulohan ni Agricultural Attache ug Foreign Agricultural Service (FAS) nga si Mark Hanzel uban si Agricultural Specialist Lary Nel Abad.
Gipahibalo ni Mark Hanzel ang tumong sa USDA dinhe sa Pilipinas kabahin sa agrikultura, samtang matud ni Gobernador Aris, gikinahanglan sa probinsya, nga balanse ang dagan niini ug sa turismo.
Midayeg si Hanzel ngadto sa Kagamhanang Probinsyal kabahin sa biosecurity preventive measures batok African Swine Fever (ASF), hilabi na nga Bohol ug Siquijor nalang ang nagpabiling ASF-free provinces sa Region 7.
Gihisgutan ni Hanzel nga pro biotechnology ang ilang pamaagi sa pagpang-uma nga nagsuporta sa pagkaon sa mga katawhan.
Misugilon si Aumentado kabahin sa sirkulasyon sa Anti-Genetically Modified Organism (GMO) nga ordinansa sa probinsya kay kini nagdili sa pagtanom sa maong klase sa binhi sulod sa probinsya.
Mitanyag usab si Hanzel sa pagtabang nga ma-edukar ang mga Bol-anon kabahin sa GMO aron mas masabtan sa katawhan ang epekto niini ug aron masayran sa kadaghanan ang maayo nga epekto kung pro biotechnology ang sistema sa pagpang-uma.
Samtang sa laing bahin, gihisgutan ni Aumentado ang cattle raising sa probinsya isip proyekto nga gipakadak-an karon sa Kagamhanang Probinsyal sa Bohol, aron makaabag sa mga mag-uuma sa ilang panginabuhi hilabi na sa mahilig magbuhi og kahayupan.
Matod pa niya nga adunay mga baka nga musustiner sa sobra nga init sa panahon ug kini nga klase sa baka ang angay pasanayon hilabi na ning panahon nga adunay El Niño.
Naobserbahan ni Hanzel nga kasagaran ang agrikultura o pagpang-uma sa nasod hilabi na sa Bohol, ginagmay ra o small scale diin pwede pa kini mapalambo.
Nahisgutan usab ang mga posibilidad sa mas lawom nga pagtinabangay aron mas mulambo pa ang agrikultura sa Probinsya sa Bohol. ALT/ JJA
