By Rey Anthony Chiu | 07:43 PM October 14, 2021

Sa katapusan, hinay na usab nga napaubos, dili lang ang mga numerous sa ianadlaw nga pagsubay sa ga kaso sa coronavirus disease (Covid-19) kon dili usab ang pagdagsang sa mga pasyente sa Covid-19 sa mga ospital dinhi sa Bohol.

Kini maoy namatikdan sa hiniusang pagsunod ug pagsubay sa pagdagan sa mga datus sa usa ka buwan nga Hospital Care Utilization nga gipadayag sa Department of Health (DOH).

Didto sa tigum sa Bohol Inter Agency Task Force on the Management of Emerging Infectious Diseases Strategic Communications Cluster sa mi-aging adlaw, gipakita sa DOH ang nasampit nga kasayuran.

Sa ilang kasayuran nga gipadayag, si Neil John Ochoco sa DOH mibutyag nga sa ward beds pananglitan, gikan sa Septembre 9, 2021 kanus-a miabut sa high risk ang kadaghanon sa mga bakante nga kama alang sa Covid sa 81% nga paggamit, anaa na karon sa 55% ang ulilization, usa ka buwan ang nakalabay.

Sa mga kama sa isolation alang sa mga pasyente sa Covid, gikan sa 86% nga anaa na tungatunga sa critical ug high risk niadtong Septembre 13, ang kasamtangan nga occupancy rate karon, anaa na sa 55%, o low risk na.

Ang sa mechanical ventilators, gikan sa 77% nga anaa sa high risk niadto gihapong semana, 53% na karon ug anaa na sa low risk usab.

Sa mga kama sa Intensive Care Units, gikan sa 92% nga occupancy rate nga anaa sa critical level niadtong Septembre 13, nagpabilin man gihapon kini sa critical level apan anaa na sa 86%, unom ka porsyento ang nakaltas gikan sa Septembre 13.

Kahinumduman nga niadtong mi-aging buwan, gipagawas ni Gobernador Arthur Yap ang usa ka Executive Order nga nagamandu sa mga lokal nga kagamhanan sa pag-atiman sa ilang mga pasyente sa Covid nga aduna lamay mild nga mga simtomas.

Gipadayag usab sa gobernador ang mandu ngadto sa mga LGUS sa pagpalapad sa ilang mga Temporary Treatment ug Monitoring Facilities ug pagpadayon sa pagdumala sa mga quarantine facilities aron maluag-luagan ang mga tambalanan.

Gimanduan usab sa gobernador ang pagpatukod sa mga stepdown facilities ang mga LGUS aron kadtong mga pasyente nga mahimo na nga adto magpaayo sa mga kalungsuran, mabuhian na sa mga tambalanan aron mabakante ang mga kama alang sa mas nanginahangalan. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.