By Helen Castaño | 05:27 PM October 14, 2021

Tinuod ba nga ang mga baksan nga makit-an sa merkado sa Cogon sa dakbayan sa Tagbilaran binuhi sa mga engkanto?

Kini ang mga estorya sa mga residente sa Barangay Cogon, Tagbilaran City ug sa mga tindera nga ang mga baksan makita sa merkado mga binuhi sa mga engkanto nga nagpuyo sa balite tree.

Matud ni Gina Negro, usa sa mga tindera, nga normal lang sa mga tindera nga makakita og mga has sa merkado.

“Pero dili man mi mahadlok kay naanas nami. Naay ubang mga mamalitay nga mahadlok jud kung makakita,” matud pa ni Gina.

Si John Mark Estillore, ang gibantog nga “Snake King sa Cogon” pila na ka has ang iyang nadakpan.

Pero tanang has o baksan nga iyang nadakpan iya gayud kining iuli sa punuan sa balite.

“Estorya-estorya man gud nila nga binuhi kini sa mga engkanto. Mao iuli lang pud nako,” matud pa ulitawo.

Adunay mga estorya nga naay usa ka residente nga mingsuway og dakop sa baksan unya wala giuli. Unya nasakit kini.

Ang orihinal nga manakupay og mga bitin sa Cogon mao si Francisco” Angke” Vertulfo Jr nga karun didto na nagpuyo sa Cortes.

Gani niadtong Martes (Oct 12) dako nga nangaalarma ang mga tawo ug motorista human nga usa ka bitin nga moabot og kapin unom ka tiil ang gitas-on, nakit-ang nagbalikos sa wire sa kuryente mga alas 8 kagabii (Oct. 12, 2021).

Nagbalikos kini sa kuryente unya gusto mutabok sa pikas kuryente.

Ang bitin, usa ka reticulated python, nahagbong ra sab unya giuli ra nila John Mark sa balite tree. Kay nabatasan na kini nga iuli kung naay makit-an nga bitin.

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.