By Rey Anthony Chiu, PIA-Bohol | 11:28 PM August 01, 2020

Alang sa posibilidad nga mosalmot ang Bohol sa giingon nga travel bubbles sa Department of Tourism, gihimo ang labing una nga koordinasyon sa Bohol ug sa departamento sa Turismo diin mismo si Secretary Bernadette Romulo-Puyat ang magpasabot niini sa iyang pagbisita dinhi sa Bohol, Julyo 31.

Kahinumduman nga gipalubad sa DOT ang travel bubbles diin ang mga lugar nga parehas nga walay kahadlokan nga mga isyu kabahin sa makatakod nga sakit, mahimong maybisitahay ang ilang mga molupyo.

Una na nga gipasabut ni Sec Romulo-Puyat nga sa travel bubbles, “ang mga turista sa mga nasud nga may ubos o walay kaso sa COVID-19 tugotan nga mobisita sa Pilipinas basta moderetso sila og tugpa sa ilang mga destinasyon nga may international airports,” sama sa Panglao pananglitan.

Dugang sa DOT, sa travel bubbles o sa gitawag usab og travel corridors o corona corridors, ang mga nasud nga may ubos nga kaso o walay kaso sa COVID, o kadtong malampuson nga nakapakita sa kapasidad sa pagkontrolar sa nahisgutang sakit sulod sa ilang mga utlanan, mahimong molagda og bilateral agreements aron magtugot sa pagpapuslapus sa ilang mga residente, nga dili na kinahanglan pa nga moagi sa hugot nga kwarantina.

Sa kaso sa Bohol, mahimo kini nga modawat sa mga turista nga gikan sa mga lugar usab nga susama sa lalawigan nga walay kahingawa nga may magdala sa sakit dinhi.

Sa pag-anhi ni DOT Sec Puyat, si Gob Arthur Yap milingkod na uban s amga sakop sa Bohol Association of Hotels, Resorts and Restaurants (BAHRR) aron tuki-on usab ang mga lugar sa Bohol nga mamahimong isipon nga mga buwa nga walay risgo sa pagtakdanay sa sakit.

Kahinumduman nga gipadayag sa mga sakop sa sector sa turismo sa Bohol ngadto sa gobernador ang gimugna nga laraw sa Provincial Tourism Council (PTC) uban sa Bohol Tourism Office (BTO) ug sa BAHRR nga kabahin usab sa Executive Committee sa PTC.

Ang pagtuki sa DOT sa travel bubble subay usab sa panginahanglan nga hinayhinayan na og bukas pagbalik ang ekonomiya ilabi na sa turismo, panakyanan, mga balay puy-anan, hotels ug mga kan-anan aron ma-aghat na usab ang paggimok sa negosyo.

Sa mga inisyatiba nga gipasugdan sa Bohol ilabi na sa pagdumala sa sitwasyon nga ang COVID naghulga, nakita kini sa DOT, ug matud pa sa Kapitolyo, gikonsiderar na ang lalawigan nga usa sa mga travel bubbles.

Ubay usab niini nga mga kalambu-an, ug sa pagtimbang usab sa bug-at nga kahingawa sa uban nga mga Bol-anon sa pagpabukas na og balik sa mga utlanan sa lalawigan ngadto sa mga lain nga tawo nga dili Bol-anon, matud sa Gobernador nga mahimo lamang kini kon mahipno na sa Bohol ang duha ka dagkong hagit.

Una, matud sa gobernador nga kinahanglan nga mawala na ang kahadlok sa mga turista nga mosulod sa Bohol kay kini lalawigan nga luwas sa sakit, ug ang ikaduha, nga ang mga Bol-anon makombinsir nga luwas na nga mag-abi-abi sa mga bisita nga lain nga tawo.

Segun sa mga taho, samtang gitimbang sa gobernador ang hagit sa DOT, gipasabut ni Gob Yap nagdto kang Sec Romulo-Puyat nga bisan pa nga may tumong ang Bohol nga mosalmot sa travel bubbles, kinahanglan kining estudyohan og maayo sanglit labing mahinungdanon ang kaluwasan sa mga Bol-anon.

Segun sa mga taho gikan sa Kapitolyo, gusto sa gobernador nga ang pagpabukas sa Bohol sa mga bista, kinahanglan nga abagan sa estrikto nga mga palisiya sa lalawigan ilabi na batok sa COVID. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.