By Rey Anthony Chiu | 07:36 PM October 06, 2021

Bisan sa pagkab-ot pa lamang sa 30% sa kinatibuk-ang populasyon sa Bohol nga kabakunahan batok sa coronavirus disease (Covid-19), manginahanglan kini sa dul-an sa 840,000 ka doses sa bakuna.

Ug kon itandi sa kinatibuk-ang bakuna nga nadawat sa Bohol niining mga panahona, segun sa taho sa Bohol Inter Agency Task Force on the management of Emerging Infectious Diseases (BIATF), Oktubre 4, igo pa sa katunga sa 30% ang nadawat sa Bohol nga bakuna nga sama sa Astrazeneca, Sinovac, Pfizer, Moderna, SinoPharm, Sputnik V ug Johnson and Johnsons.

Kasamtangang miabut na sa 467,892 ang bakuna nga nadawat sa Bohol, apan 836,596 ka mga doses ang gikinahanglan alang sa 30% sa populasyon sa mga Bol-anon.

Tulo ka mga ang-ang ang nahisgutan sa mga batid sa pagsumpo sa sakit nga angay timan-an aron makabaton ang us aka lugar sa ilang gidahum nga mga resulta.

Una niini: sa 30% sa kinatibuk-ang populasyon nga mabakunahan, masinati na sa usa ka lugar ang pagpatag sa kadaghanon sa mga bag-ong masakit sa matag adlaw ug pagstabilize usab sa ihap sa mga mangamatay.

Aron kini makab-ot sa Bohol, manginahanglan kini og 836,596 ka tupokan sa bakuna.

Sa 50% nga mabakunahan sa tibuok Bohol, magsugod na ang pag-ubos sa mga kaso sa Covid, lakip na usab ang kinabuhi nga mahimong makalas sa sakit.

Niini, 1,394,328 ka tupokan sa bakuna ang kinahanglan.

Sa 70% nga mabakunahan, magsugod nag tibugsok ngadto sa pagkawala nay bag-ong kaso, kay wala nay kapadulngan ang kagaw kay ang tanan bakunado na.

Mokabat sa 1.95 milyones ang doses nga kinahanglang moabut dinhi nga ihatag sa nasudnong kagamhanan.

Sa labing bag-ong taho sa BIATF, anaa pa sa 467,892 ang kinatibuk-ang ihap sa doses sa mga bakuna ang nahidangat dinhi.

Kini nga kadaghanon, gikan sa Marso 6, kanus-a una nga nahidangat ang una nga batch sa bakuna batok sa Covid-19.

Ang bakuna nga sinovac maoy unang gitupok sa mga medical workers ug frontliners sa mga tambalanan sa Tagbilaran, didto sa ceremonial vaccination sa Gov Celestino Gallares Memorial Hospital.

Karon, pito ka buwan human mapasugdi ang nasudnong roll-out sa mga bakuna, segun sa BIATF, kinatibuk-ang 368,337 na ka Bol-anon ang nabakunahan.

Sa nahisgutan nga kadaghanon, 186,206 lamang ang nakakompleto na sa duha ka tupokan sa bakuna.

Kini, anaa pa lamang sa 13.35% sa kinatibuk-ang populasyon ug katunga pa gani kon ang target mao lamang ang 30% nga mabakunahan.

Ang lain nga 182,131 nakakuha na sa unang tupokan apan kuwang pa kini aron ilang makuha ang kinatibuk-ang panalipod batok sa nagpadayon sa pagpanakod nga sakit.

Sa kasamtangan nga dagan sa pamakuna, nga midangat pa og pito ka buwan hangtud nakuha sa Bohol ang 186 mil nga nabakunahan, gitumbok nga nga sa sunod nga pito ka buwan, anaa pa gihapon ang Bohol sa 737 mil nga nabakunahan.

Kon padayon nga magsalig ang Bohol sa bakuna nga ipadala sa nasudnong kagamhanan, ug sa dagan sa pamakuna, modangat pa og labing menos siyam ka buwan nga pamakuna aron makuha sa Bohol ang 70% nga pamakuna. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.