By Rey Anthony Chiu | 07:32 PM October 06, 2021

Gikan sa Septembre 6, kanus-a may 83 ka mga pasyente sa Covid ang naayo ra sa matag 100 ka pasyente, karon, miumento pa gyud ang porsyento sa mga nanga-ayo human matakdi sa Coronavirus disease (Covid-19).

Sa labing bag-o nga kasayuran nga nasukip sa Covid-19 daily update nga gipaambit sa Bohol Inter-Agency task Force on the management of Emerging Infectious Disease, Oktubre 6, miabut na sa 91 sa matag 100 ka pasyente ang mauli-an ug makalingkawas sa Covid-19.

Kahinumduman nga niadtong Septembre 6, usa ka buwan gikan karon, may natala nga kinatibuk-ang 14,170 na ka Bol-anon ang natakdan sukad nakasulod ang sakit dinhi.

Niini nga kadaghanon, niadtong adlawa, ang kinatibuk-ang ihap sa nangaayo na, gikan sa pagkatakdan sa nahisgutan nga sakit miabut sa 11,815.

Ang recovery rate niining adlawa sama sa recovery rate sa semana nga kini nga datus gipagawas: ang rate naa sa 83 porsyento o 83 sa matag 100 ang mangaayo.

Sa Oktubre 6, laktud usa ka buwan samtang nagpadayon ang pagpanghulga sa sakit, namatikdan sa mga naniid ang kasamtangan nga mga datus: 18,723 na ang kinatibuk-ang Bol-anon nga nangatakdan: ang pipila ka nila, walay swerte nga nangamatay, apan mikabat na usab sa 17,076 ang mga nanga ayo.

Niini nga kasayuran napagawas nga human sa us aka buwan, mimaayo usab ang kadaghanon sa mga maulian sa sakit gikan sa 83 ngadto sa 91.

Hinuon, sa mga nangamatay, gikan sa 310 nga kinatibuk-ang ihap niadtong Septembre 6, mikatay na kini ngadto sa 493 sa Oktubre 6.

Sa pagsulod sa Oktubre, gikan sa 461 ka mga nangamatay, human sa lima ka adlaw, ang kadaghanon sa nangamatay, mas midaghan pa og samot ngadto sa 493.

Sa buwan sa Oktubre lamang, 32 na ang nakalas.

Dinhi, dugang pag-awhag sa mga tinugyanan ngadto sa mga Bol-anon sa pag-amping, paglikay sa mga dili importante nga kalaw, pagpanghunaw aron mamatay ang kagaw ug ang pagsul-ob og face mask ug face shield kanunay.

Samtang mihinay nag pangbukas ang mga negosyo, aghat sa mga tinugyanan, likayi kanunay ang mga lugar nga daghang tawo ug dili sayon ipatuman ang social distancing.

Matud nila, ang pagpabakuna pa gihapon ang mas sustenable nga paagi pagbatok sa sakit. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.