By Rey Anthony Chiu | 07:42 PM October 06, 2021

Giuswag pinaagi sa lain nga Executive Order (EO) gikan sa Kapitolyo ang EO 45 nga mihupas na niadtong Septembre 30, 2021 samtang gipauswag na usab gihapon ang gipatas-an nga mga restrictions dungan sa mga lagda sa kwarantina ubos sa General Community Quarantine dinhi.

Pinaagi sa Executive Order No. 48, series of 2021, gipauswag ni Gobernador Arthur Yap and EO nga iyang gipagawas niadtong Septembre 7, 2021, nga nagpatuman sa dugang nga mga lagda nga sundon sa tibuok lalawigan sa Bohol ug ang pagmandu sa mga LGUs ug nga ahensya nga tigpatuman sa balaod sa hugot nga pagpasunod sa mga regulasyon sa kwarantina.

Ang nahisgutang EO, gipagawas sa goberandor diha nga namatikdan nga mingkalit og paspas ang pagdaghan sa mga kaso sa coronavirus disease (Covid-19) ug ang pagkatap sa hulga sa Delta variant.

Dungan usab nianang panahona, namatikdan usab ang pagsugwak sa mga pasyente nga nangabut sa mga ospital, nga nagpahimutang sa peligro sa mga ospital nga mapuno ug dili na unya makaatiman sa mas nanginahanglan.

Septembre 23 usab diha nga ang Inter Agency task Force on the Management of Emerging Infectious Diseases mipagawas sa Resolution No. 140, series of 2021 nga nagpahimutang sa kinatibuk-ang Bohol sa General Community Quarantine ug nagpapatuman sa mga hugot pang mga lagda.

Apan bisan sa EO 45 ug sa mga gipahugtan nga mga lagda, nagpadayon pa gihapn ang taas nga pagpanakodtakod sa Covid- 19 sa Bohol nga inay makaginhawa na unta ang mga tambalanan, wala pa kini gihapon mahiluna.

Wala pa usab mapabarug sa Bohol ang gitawag og Temporary Treatment and Monitoring facility subay sa gimandu sa EO 46 series of 2021.

Dala niini, nakita sa gobernador ang panginahanglan nga ilugway pa ang ka epektibo sa mga nahaunang EO, samtang ang IATF nagpabukot pa sa Bohol sa GCQ.

Sa labing bag-o nga EO 48, matud sa gobernador ang mga rekisitos alangsa pagbyahe pasulod sa Bohol, magsunod pa gihapon sa EO No. 42 , ug sa nag-pausab niini nga EO 43.

Wala may kwarantina nga pangayoon sa mosulod sa Bohol, kinahanglan pa gihapon ang negatibo nga resulta sa Covid test pinaagi sa RT PCR nga gikuha 72 oras sa dili pa molarga paingon nganhi, ig ang pagparehistro sa S-pass.ph aron makapahibaw sa modawat nga LGU ug kahatagan sa mga gikinahanglan sa pagsulod nganhi.

Gipadayon pa usab gihapon ang partial liquor ban subay sa nahaunang EO 42, samtang matud sa nag-ong EO, magpabilin pa gihapon ang lukop sa Bohol nga curfew gikan alas 10:00 sa gabnii ngadto sa alas 4:00 sa buntag. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.