By PIA-Bohol | 08:20 PM February 12, 2026
TAGBILARAN CITY, Bohol —Samtang ipatuman sa Social Security System (SSS) ang ikaduhang hugna sa usbaw sa pension nga madawat sa mga retiree ug disability pensioners ug survivor pensioners karong tuiga, mipasalig ang SSS, wala unay usbaw sa kontribusyon.
Kini ang gipalubad ni SSS Region 7 Communications Analyst Sherwin Dan Solibaga, didto sa Kapihan sa PIA niining semanaha.
Gipahinumdom ni Solibaga nga human gipatuman nga P1 libo nga usbaw sa pension niadtong gimando niadtong 2016, nagpaabut ang katawhang sakop sa SSS sa ikaduhang hugna.
Taliwa niining tanan, nagpahimo ang SSS og pagtuon nasayran nga dili mahimong sustenable ang laing P1 libo nga usbaw.
Apan gipaambit sa tinugyanan nga nakit-an usab sa SSS kon may ginagmay nga paagi sa pag-usbaw, mahimo kini ikapatuman sa 3.8 milyones ka mga pensionado nga nagdawat sa ilang binuwan nga pahat gikan sa SSS.
Niini, sa mandu usab ni Presidente Ferdinand Marcos Jr. ug ni Finance Secretary Ralph Recto nga maoy chairperson sa Social Security Commission, segun sa pagtuon, mahimo ang usbaw sa tag 10% sa matag tuig sulod sa tulo ka tuig.
Gisugdan dayon sa SSS ang unang usbaw niadtong Septembre 2025: 10% alang sa disability ug retiree pensioners ug 7% sa survivor pensioners, dayag ni Solibaga.
Karong umaabut nga Septembre niining tuiga, mapaabut ang ikaduhang hugna sa 10% nga usbaw sa pension sa mga retirees, disability pensioners ug laing 7% alang sa survivors pension.
Sa Septembre 2027 na ang ikatulo nga usbaw sa laing 10% ug 7% sa mga nahigutang pensioners.
Ug alang sa mga nahingawa nga ang usbaw magdala usab sa pagpasaka sa kontribusyon ngadto sa SSS, gitataw sa mga tinugyanan, wala usbaw sa kontribusyon hangtud sa 2027. (PIABohol)
