By PIA-Bohol | 07:21 PM April 03, 2025
Sa kawhaan og walo ka operations, nasikop sa hiniusang bahan sa kapolusan ug sa mga tinugyanan sa Philippine Drug Enforcement Agency (PDEA) ang 28 ka mga suspetsado ug kinatubuk-an nga P643,416 nga balor sa drugas, sulod sa usa ka semana.
Sa weekly operational Accomplishments sa Kampo Dagohoy, gibutyag ni Police Colonel Arnel Banzon nga mikabat sa kinatibuk-an nga 61.22 gramos nga shabu ang nasakmit sa mga otoridad sa 28 ka operasyon niini, ug bases sa tamdanan nga gipagawas sa Dangerous Drugs Board, kini may gibanabana nga bili nga moabut sa sobras tunga sa milyon.
Ang mandate sa pagpukan sa illegal nga drugas nakasandig sa PDEA, apan ang kapulisan, gihatagan usab sa mandato nga moabag sa PDEA niining gimbuhaton.
Segun sa lagda sa balaod, ang masakmit nga illegal nga drugas, personal nga dalhon sa teamleader sa kapolisan o bahan nga nanguna sa operation ngadto sa Philippine National Police Crime laboratory aron madawat ug karesibohan.
Ang chemist usab sa Crime Lab, maoy engkargado sa gihatud nga drugas aron tipigan, ug mandu sa korte lamang ang makapalihok sa chemist ug Crime Laboratory Chief aron mapagawas ang drugas gikan sa tipiganan.
Kay ang drugas mahimong ebidensya sa kaso, dili usab kini mahimo nga makuhaan, gawas lamang kon sobra na sa gikinahanglan isip edidensya, ang korte momnado sa pipila lamang ka gramo ang ipresentar sa korte, samtang ang nahibilin, pwede na nga sunogon.
Sa mandu usab sa balaod, ang drugas nga human ika presentar sa korte, tunawon pinaagi sa cremation, segun sa bag-ong pamaagi sa pagpapas na sa illegal nga mga ebidensya.
Sanglit ang Bohol, wala pay pasilidad alang sa pag cremate, sa mandu sa korte, ang mga drugas nga masakmit, ubanan sa mga testigo samtang dalhon sa Sugbo ug didto himoon ang cremation o pagtunaw gamit ang sobra ka init nga kalayo, segun usab sa proseso nga gilagda sa Department of Environment and Natural Resources nga ang pagsunog, kinahanglang walay polusyon nga maka-alisngaw ug makadaut sa tawo. (PIABohol)
