By PIA-Bohol | 10:32 PM November 26, 2024
Tulo ka mga bahan gikan sa Office of the Provincial Veterinarian (OPV) sa Bohol ang kasamtangan nga nagdumala sa pagpahigayon sa mga lakang aron mapugngan ang pagpagawas sa buhi nga baboy ug karne gikan sa tulo ka mga purok sa San Vicente San Miguel.
Kini human nakompirmar sa Department of Agriculture, nga positibo sa African Swine Fever (ASF) ang tulo sa 13 ka blood samples nga nakolekta sa mga tinugyanan sa OPV gikan sa mga baboy nga gituohang apektado sa nahisgutang sakit.
Sunod na niini, sugdan na dayon ang pagkuha sa mga blood samples gikan sa mga baboy nga nahimutang sulod sa 500 metros gikan sa sentro diin natumbok ang nagpositibo sa sakit, ug anam-anamon og testing paduol sa may sakit aron tumbokon kon hain taman ang naapektohan, mandu ni Gobernador Eriro Aristotle Aumentado, didto sa tigum sa Provincial ASF task Force Nob 25.
Gimandu usab ni Gob Aumentado ang pagpadala og dugang mga teams gikan sa Kapitolyo aron makatabang sa pagpahimutang sa mga movement control zones, ug sa pagsugod na sa pag-testing sa mga baboy sa mga silinganan nga lugar aron ilhon kon nakatakod ba ang sakit.
Pasugdan na usab sa OPV ug sa ASF task Force ang pugos nga pagpamatay sa mga baboy nga anaa sa mga duol nga lugar, aron dili na makalabang ang sakit.
Didto sa tigum sa Provincial ASF Task Force, Lunes sa hapon, gitaho ni Veterinarian Dr. Meydallen Paman, nga Nobyembre 22 pa lamang nataho ngadto sa ilang buhatan ang pagpangamatay sa mga baboy sa nahisgutang lugar.
Nianang sunod nga adlaw, tumbok na ang gidudahang impeksyon sa Purok 3, Purok 6 ug Purok 7, diin mikabat sa 22 ka mga baboy, apil ang mga anay ug baktin ang nangamatay.
Sa mga gikolekta nga sample sa dugo ug gipasusi sa laboratoryo sa OPV sa Bohol, tulo sa mga samples ang tumbok nga nagpositibo, ug kini usab gikompirmar sa DA sa ilang laboratory sa Regional Office.
Apan, matud ni San Miguel Mayor Ian Gil Mendez, napahimutang na sa lungsod ang mga control points palibot sa mga kabalayan nga gidudahang didto nagagikan ang sakit.
Kasamtangan kita nga nag-fine tuning sa mga lugar aron pugngan gayud ang kadtong mohikoy og pagawas, matud sa Mayor, kinsa migamit na sa 18 niini ka mga Barangay Livestock Aides ug ang tibuok bahan sa kapolisan ug mga barangay officials alang sa mga opperasyon.
Nalipay usab siya nga nakasabut ra ang mga katawhan sa mga lakang nga gipatuman sa LGU ug sa OPV samtang gipapun-an na sa gobernador ang mga bantay aron makontrolar ang sakit.
Gipasalig usab sa ASF task Force nga dili niini pasagdan ang San Miguel ug magtagana usab kini og suporta nga pundo alang sa sunod nag 15 ka adlaw nga pagpakigbugno aron papason ang kagaw didtong dapita. (PIABOHOL)
