4 LAB gitugyan sa 1 ka adlaw

By PIA-Bohol | 07:28 PM January 28, 2025

Sa labing una nga higayon, upat ka balay ang gitugyan sa mga kapolisan ug sa benefactor sa libreng pabalay: ang banay ni Gob Erico Aristotle Aumentado, ngadto sa mga Bol-anong mahadlokon sa balaod ug nanimuyo nga sulondon og gawi, bisan pa man  sa  ilang kalisud. 

Kasagaran sa mga turn-over nga gipanghimo, tulo ka balay ang labing daghan sa usa  ka adlaw, apan Enero sa 28, upat ka balay ug tadlas sa kinatibuk-ang Bohol ang mga kapolisan. 

Si Gobernador Erico Aristotle Aumentado, kauban sa iyang banay, maoy personal nga benefactor sa Balay sa Paglaum, nga karon maoy gihimong proyektong Libre’ng Alagad ug Balay (LAB) sa mga kapolisan sa Bohol sukad sa 2023, matud ni Police Lieutenant Colonel Norman Nuez, kinsa representante ni Police Colonel Provincial Director Arnel Banzon. 

Sa ika 18 ka buwan human gikalusad ang proyekto, gitugyan ang ika 45 ngadto sa ika 49 nga balay sa 145 ka balay na nga napundohan na sa LAB sa 2024. 

Gani, dugang ni LtCol Nuez, halos 100 pa ka balay ang kasamtangan nga humanon, bisan pa nga sa tabang sa mga boluntaryo nga mga sakop sa kapolisan, mga fraternity, barangay officials ug mga silingan, may nga balay nga duha lamang ka adlaw nga trabahoan, mahuman na dayun. 

Sa 2025, mas daghan pa ang napundohan ug anaa na sa listahan sa kapolisan, dugang ni Nuez. 

Matud ni Aumentado, dugay ra nila sa ilang banay nga giplano nga maghimog tabang sa Balay sa Paglaum, apan dili nila gusto nga maduhigan og pamolitika, mao nga dihang gihangyo sa kapolisan ang partnership, sayud ang mga Aumentado nga ang kapolisan dili mapolitika. 

Kadtong mga mahadlokon sa balaod, maayo’g gawi sa kinabuhi ug kaabag sa kapolisan sa pagbantay sa mga komunidad batok sa mga criminal, kadtong tua sa mga suok nga lisud dulngon sa tabang, saysay ni Aumentado, sa mga angay hatagan. 

Sa Purok 2, Cabad, Balilihan, nakadawat  sa iyang bag-o ug disente nga balay human naguba tungod sa bagyo nga Odette ang usa ka byuda. 

Si Cristobala Lozada, 69 anyos nag-inusara na lamang nga nagpuyo human nangaminyo na og naglain nag pinuy-anan ang upat niini ka anak. 

Naabtan sa kapolisan ug ni Gob Aumentado ang komunidad sa Cabad, gikan sa barangay tanod, opisyal, BHW ug mga silingan nga nagtinabangay aron himoon nga sadya ang pagtugyan sa balay nga gianha mismo sa gobernador, didto. 

Didto sa Bilar, sa Purok 1 sa Barangay Zamora, laing balay ang gitugyan ngadto kang Jimmy Ibañez. 

Sa Jagna, sa Sitio Tinakbasan, Purok 2 sa Barangay Kinabag-an, gitugyan usab ang laing bag-ong balay ngadto kang Evangelita Sajul. 

Sa laing bahin, didto na usab ang kapolisan ug  ang bahan sa gobernador sa Garcia Hernandez, sa East Lungsodaan aron itugyan ang bag-ong nahuman nga balay alang ni Rey ug Jasmine Gudito. (rahc/PIA_7/Bohol)