By PR | 04:11 PM April 22, 2024
“Ang iyang personal nga gibati way labut sa akong mandato isip usa ka opisyal sa kagamhanan,” tubag ni Bise-Presidente Sara Duterte sa mga pamahayag batok kaniya ni Unang Ginang Liza Marcos.
Niadtong niaging semana, nagpahungaw sa iyang gibati ang Unang Ginang sa usa ka interview uban sa tigbalita nga si Anthony Taberna.
Lakip sa gipahungaw sa Unang Ginang ang matud pa pagkatawa sa Bise-Presidente dihang gitawag sa iyang amahan, kanhi Presidente Rodrigo Duterte si Presidente Marcos nga “drug addict”.
Sa iyang tubag, namahayag ang Bise-Presidente nga katungod sa kapikas ni Presidente Ferdinand Marcos Jr. nga mobati og kahiubos ug kasuko.
Apan giklaro ni Bise-Presidente Inday nga aron moirog ang nasud, “pasagdan na nato ang usa ka pribadong pakighinabi” nila ni Presidente Marcos alang sa mga mosunod nila nga lakang.
“Mga kaigsuonan, nag-atubang ang atong nasud og dagkong mga problema nga kinahanglang solusyonan sa gobyerno,” sumala pa sa Bise-Presidente sa iyang pamahayag.
Dugang pa niya, angayan nga maoy tutokan ang pagtubag sa mga suliran nga giatubang sa nasud.
“Padayon ang pagsaka sa presyo sa pagkaon ug uban pang mga palaliton ug kini nakapasamut sa giantus nga gutom o kakuwang sa hustong pagkaon sa mga kabus nato nga katawhan,” sumala pa ni Bise-Presidente Inday.
Anaa pa ang naghulga nga kakuwang sa supply sa tubig ug kuryente, samtang naghitak na usab ang gidili nga droga, dugang pa niya.
Gawas pa niini, nagkanayon ang Bise-Presidente nga wa pa natapos ang hulga sa kriminalidad, terorismo ug insurhensiya sa atong nasud.
“Kini ang mga butang nga angay natong hatagan og pagtagad,” sumala pa ni Bise-Presidente Inday.
Pintok ang panapos sa Bise-Presidente: “unahon nato ang Pilipinas”.
