By PR | 08:17 PM March 10, 2024
Tungod sa walay paglugak ug agresibong kampanya ug sa tabang usab sa mga katawhan, napugngan sa kapolisan sa lalawigan sa Bohol ang pagkuyanap unta sa milyon-milyong kantidad sa illegal nga drugas.
Mokabat ngadto sa kapin 25 ka kilo nga shabu ang nasakmit sulod sa 14 ka bulan sukad Enero 2023 hangtud ning bulan sa Marso karong tuig nga may kantidad nga P172.7 milyones.
Kini maoy gibutyag ni Police Lt. Col. Joseph Berondo, hepe sa operations base sa datos sa Bohol Provincial Police Office (BPPO) atol sa press conference sa Camp Dagohoy Marso 7.
Matud pa ni Berondo, kini naglangkob sa 11 ka kilo ug 343.89 gramos nga nagkantidad og P77,138, 452 sukad lang niadtong Enero hangtud Marso 6 karong tuiga.
Sa milabayng tuig, nailog ang kinatibuk-ang 14 ka kilo ug 59.97 gramos nga nagkantidad og P95,607,796 gikan sa Enero 1 hangtod sa Disyembre 31,2023.
Ang sumada moabut og P172,746,248 ang balor sa shabu ang nasakmit gikan niadtong Enero 2023 hangtod ning unang semana sa Marso.
Sulod sa maong panahon, niabot sa 757 ka anti illegal drugs operation ang nahimo nga niresulta sa pagkasikop sa 815 ka mga drug personalities nga gikonsiderar nga mga high value individuals ug street level individuals sa listahan sa PNP national headquarters ug ingon man ang non-listed o bag-ong mitumaw.
Gawas sa shabu, ang kapolisan nakasakmit usab 21 gramos sa Marijuana nga nibalor og P2,520.
Si Police Col. Lorenzo Batuan, hepe sa Bohol PNP, miingon nga parehong gipangusgan sa kapolisan ang kampanya aron kunhoran ang suplay ug demand o panginahanlan sa drugas.
Matud ni Batuan, walay shabu laboratory ug wala puy organisadong drug group sa Bohol ug ang mga supplier gikan sa laing probinsiya sama sa Cebu.
Giklaro ni Batuan nga wala magbaha ang ilegal nga druga sa Bohol sukwahi sa pasangil sa mga kritiko ug gani ila kini nga napugngan sa tabang ug suporta usab sa ubang ahensya sa kagamhanan ug sa lokal nga mga opisyales ug sa komunidad.
Mapasalamaton si Batuan sa kagamhanang probinsiyal pinangulohan ni Gobernador Erico Aristotle Aumentado sa suporta nga gihatag kanila aron makab-ot ang tinguha sa administrasyong Aumentado-Balite nga zero drug case ang lalawigan sa Bohol. (PIMO/AT)
