By Bishop Alberto Uy, Bishop Patrick Daniel Parcon | 10:41 AM March 10, 2024
Mga binati namong kaigsuonan diha ni Kristo,
Ang kalinaw nga gasa sa Diyos sa gugma mag-uban unta kaninyo!
Dala ang dakong kabalaka, kami nagasulat kaninyo mahitungod sa pagtumaw pag-usab niining suliran sa droga. Niining ulahing mga adlaw, atong nadungog ang balita bahin sa pagsikop didto sa Sugbu sa duha ka managsoon nga Bol-anon nga kuno nagdala o nagpayuhot sa ginadili nga droga. Ug dinhi sa ato mismong probinsya, nagsunod-sunod ang nadakpan nga mga druga nga nagkantidad og minilyon. Angay nga ipangutana kung unsa na kakuyanap ang maong problema aron kini mahatagan og igo nga pagtagad sa mga ahensiya sa pangagamhanan ug sa tibuok katilingban.
Isip inyong mga Obispo, among gibati ang dakong kaakuhan sa among kabahin ug sa kabahin sa mga kaparian isip inyong mga pastol, nga mopahinumdom sa tanan sa dili ti-aw nga hulga nga dala sa droga. Dili masaysay ang kadaot nga bitbit niini diha sa kinabuhi sa katawhan ilabi na sa mga kabatan-onan. Pila na ka kinabuhi ang naguba, pila na ka pamilya ang nabungkag, pila na ka krimen ang nahitabo tungod niini? Daghan ang mahaylo kay lagi ang droga mohatag man og lumalabay nga kagaan ug kalingawan apan dili maisip ang kaalaut nga sa ngadto-ngadto mamahimong bunga niini.
Mga binati namong igsuon, dili bag-o ang kasinatian nga kita isip katilingban gihadla sa makalilisang nga kahimtang. Si Kristo mipasidaan na man daan sa iyang mga tinun-an nga “dinhi sa kalibutan adunay daghang kalisdanan”. Apan, midugang siya sa pag-ingon, “Pagmalig-on; gibuntog ko na ang kalibutan” (cf. Jn 16:33). Dinasig niiing mga pulong sa Ginoo, kita mobarog nga nagkahiusa aron atubangon ug buntogon kining suliran sa droga. Ang mga banay, ilabi na ang mga ginikanan, adunay dili mailisan nga papel diha sa pagbantay ug paggiya sa mga kabataan aron sila mahilayo gikan niini. Gikinahanglan ang abli o bukas nga paghinabi tali sa mga ginikanan ug mga anak aron mapatuhop diha sa mga kabataan ang mga hiyas sa pag-amping sa kaugalingon, disiplina ug kalig-on diha sa pagbalibad sa tentasyon.
Sa susamang paagi, ang mga eskwelahan ug mga magtutudlo adunay mahinungdanong papel diha sa pagtudlo sa mga kabataan sa mga kadaut nga epekto sa droga. Pinaagi sa edukasyon, mahatagan og kahigayonan ang mga estudyante nga makakita sa maayong dalan ug makahulma sa ilang kaugalingong paghukom kung unsa ang angay ug matarong.
Among giawhag ang atong pangagamhanan, ang mga ahensiya sa gobyerno, ilabi na ang mga mayor ug kapulisan, sa pagdoble sa ilang paningkamot aron masumpo ang pagkuyanap pag-usab sa droga diha sa atong mga kadalanan. Tingali angay nga hisgotan pag-usab ang mga konkretong lakang sama sa curfew nga posibleng makatampo sa usa ka malahutayon nga solusyon.
Andam ang mga Diyosesis sa Tagbilaran ug Talibon sa pakigtambayayong sa gobyerno diha sa paningkamot nga kining droga masumpo. Makatabang ang mga kapilya ug clusters aron mapaabot sa kinaubsang hut-ong sa kabarangayan ang mga information materials nga andamon alang niini. Amo usab nga gidasig ang mga Catholic schools dinhi sa ato sa paglusad og programa isip kontribusyon niining maong paningkamot.
Dako ang hagit nga atong giatubang apan kung magkahiusa kita, inubanan sa grasya sa Diyos, walay dili nato mahimo. Atong hinumdoman kanunay nga kining atong paningkamot maglatid unya sa dalan ngadto sa lamdag ug mabungahong kaugmaon alang sa atong katawhan.
Uban kaninyo nga naglawig sa gugma, pagtuo ug paglaum,
- ALBERTO S. UY, DD
Obispo sa Tagbilaran
+PATRICK DANIEL Y. PARCON, DD
Obispo sa Talibon
09 Marso 2024
