By Ric Obedencio | 08:24 PM October 19, 2022
Usa ka “public consultation” mahitungod sa planong ibalik sa national ang pag-amuma sa mga hospital sa Bohol pagahimoon ugma sa alas 2:00 sa palis sa may session hall sa Sangguniang Panlalawigan, new Capitol, Tagbilaran City.
Kini giluwatan sa buhatan ni Congresswoman Alexie B. Tutor, kinsa mao usab ang mangulo sa naasoyng “public consultation.” Ang “public consultation” usa sa mga pamaagi aron sa pagpulso sa sentimento sa publiko kalabot sa balaodnon nga giang-at ni Tutor sa House of Representatives (HOR).
Gidahum nga motambong sa “public hearing” mao ang mga health officials, chiefs of hospitals ug ubang sector ug health committee sa SP.
Ang plano ni Tutor sa pagsangon balik sa national government nga mag-atiman sa mga hospital, sama sa Candijay Community Hospital, nahimo tungod sa kakuwang sap undo sa provincial government sap ag-asikaso sa mga panginahanglan niini.
Ang Bohol nagsagubang sa pagmintinar sa operations sa 10 ka mga hospital nga gipanag-iyahan ug gidumala niini. Kini mga hospiatl nahimutang sa lungsod sa Jagna, Candijay, Pitogo, Carmen, Talibon, Inabanga, Catigbian, Loon, Maribojoc ug Clarin human sa “devolution.”
Kahinumduman nga wala makakuha sa suporta si Tutor sa niaging administrasyon ug sa SP sa pag-indorso unta sa iyang House Bill aron mabalik ug maniobra sa national ang Candijay Community hospital sumala sa gipangayo sa HOR.
Ang SP kanhi gidumala ni Bise-Gob. Rene Relampagos ug mayoriya niini mga sakop niya.
