By Rey Anthony Chiu | 09:08 PM July 20, 2022
Mikabat na sa P3.6 milyones ang nahipos nga halin sa mga food concessionaires nga nag-alagad sa mga manuroyay ug mitambong sa kasadya sa Sandugo nga diha gipahimutang sa Sandugo Festival Grounds sa daan nga Airport sa Tagbilaran.
Kini maoy gitaho sa Sandugo Foundation pinaagi ni Ana Loinda Saluan, interim coordinator sa Sandugo 2022 Festival events, atul sa gipahigayon nga Capitol Reports niadtong Biyernes.
Ang kagamhanang Probinsyal sa Bohol, Small Medium Enterprise Development Council (SMED-C) sa suporta niini sa mga gagmay nga mamumuhunan o micro, small ug medium enterprises, nagtanyag sa mga tig-dalit sa pagkaon sa pagpahimutang sa ilang kaugalingon didto sa daan nga airport.
Daan na nga gibuksan niadto pang 2021 dungan sa Ubi Festival, ang mga food concessionaires nga apektado sa coronavirus disease, giabagan sa libre nga pagpahimutang sa daan nga airport, aron makabangon sa ilang pamuhunan.
Nainat pa ang ilang libre nga kahigayunan dihang napalukapa na usab tungod sa Odette, ang mga food concessionaires nagpadayon hangtud sa Sandugo 2022.
Hinuon, gikan sa usa ka tinubdan sa Kapitolyo, sa 50 ka mga concessionaires samas mga barbecue stations, restaurants, nagtanyag og snacks ug refreshments ug streetfood pa lamang, gikans a Hulyo 1 sa pagbukas sa Sandugo Festivities sa Festival grounds hangtid sa milabay nga semana, nakaabut na sa P3.6 M ang nahalin nga pagkaon ug serbisyo didto.
Gawas pa sa dali, barato ug limpyo nga pagkaon alang sa mga mosawo sa kasadya sa Sandugo, may mga nightly events usab ang Sandugo Festival didto sa airport grounds, nga pasundayag sa mga nagkadaiyang banda ug tiglingaw.
Gani, sugod sa Bohol Day, Hunyo 22, buksan na usab ang International Food Fusion, nga nahimong kinaham nga tinuig nga dalit sa Sandugo.
Dinhi, dalhon sa mga inilang restaurants, hotels ug resorts ang ilang mga bantugan nga chefs sa Festival Grounds aron moandam sa mga pagkaon nga dali ra’ng maorder sa mga buot motilaw niini.
Niini, dili na kinahanglan pang moadto sa mga resorts ug inilang resturants sa Panglao, Anda, Tagbilaran ug ubang bahin sa Bohol.
Gikan sa mga inila nga resto ug hotels and resorts, maorder na ang ilang mga pagkaon nga kinahan diha sa Festival Grounds sugod sa Biyernes, dugang ni Saluan. (rahc/PIA-7/Bohol)
