By Rey Anthony Chiu | 09:18 PM July 20, 2022
Pormal na nga gilusad ang bag-ong cluster sa mga kalungsuran nga mosagop sa panggatasan, didto sa ika unom nga Milk Festival nga gipahigayon sa Bood Ubay.
Mismo is Gobernador Erico Aristotle Aumentado kauban sa mga opisyales sa Department of Agriculture ug mga ahensya niini nga nahilambigit sa pagpanggatasan ang misaksi samtang pormal na nga magsugod sa pagpanggatas sa Tubigon,Carmen, Sagbayan, Danao, Clarin, San Isidro, Catigbian, Antequera, Balilihan, Corella, Sevilla, Sikatuna ug Batuan.
Ang bag-ong cluster nga giapilan sa napulo ug tulo ka mga kalungsuran, magdugang sa unang siyam ka kalungsuran nga maoy labing una nga nagpalapad sa industriya sa panggatasan dinhi sa Bohol.
Inay naandan sa Bohol ang kabaw nga igo rang gamiton sa pagdaro iug karnehon, may bag-ong kapaningabuhian dinhi nga magsalig sa kabaw: ang pagkuha sa gatas niini aron ibaligya ug gamiton sa pagbuntog sa malnutrisyon.
Kahinumduman nga ang Philippine Carabao Center (PCC) ahensya ubos sa Department of Agriculture ang naghimo og pagtuon nga nagpadayag nga basta mogamit lamang sa kabaw nga gipataas ang klase, ang pagkuha sa gatas niini, mahimong kasaligan nga dugang sa kita sa matag banay.
Gani, sa unang mga tuig nga gisuwayan ang pagkuha sa gatas sa mga kabaw sa PCC ug baka sa National Dairy Authority (NDA), inabagan sa mga mag-uuma nga misuway sa pagpanggatasan, nakab-ot sa Bohol ang unang us aka libo ka litro nga gatas gikan mismo sa mga hayop dinhi, matud pa ni Dr. Stella Marie Lapiz, Provincial Veterinarian ug numero uno nga tigduso sa panggatasan dinhi.
Ug sanglit ang PCC ug NDA, adunay mga kaugalingong institutional farms nga nagpadaghan sa gatas nga nakuha sa Bohol, gitinguha sa unang mga tigsagop sa panggatasan nga makuha na nila sa ilang kaugalingon mismo ang usa ka libo ka litro matag adlaw.
Alang kang Fernando Dupalco, us aka manggatasan nga may unom ka gatasan, ang matag kabaw nga manganak, mohatag og labing menos 5 ka litro nga gatas, nga paliton usab sa PCC Ubay Stock Farm sa tag P50 ang litro.
Gawas sa nati nga pwede alimahan ug padak-on aron magamit sa pagdaro, o ibaligya samtang ang nati nga mahimong gatasan, idugang sa maghatag og gatas.
Si Dupalco, kasamtangan nga membro sa board sa Bohol Dairy Cooperative, ang hugpong kinsa maoy nag-atiman sa pagpadaghan sa gatas nga makuha sa mga gatasan, nagpasagop na sa siyam ka kalungsuran nga naggatasan.
Ang siyam ka kalungsuran nga unang nagpasakop sa industriya sa panggatasan sa Bohol maoy gisaligan sa pagsupply sa mga gatas nga gigamit sa Provincial Milk Feeding Program nga magpainom sa gatas sa 39 mil ka kabataan.
Ang unang siyam ka lungsod nga maoy dugokan sa panggatasan sa Bohol mao ang Ubay diin nahimutang ang mga processing facilities sa gatas, President Carlos P. Garcia, Mabini, Alicia, Trinidad, Talibon, Bien Unido, San Miguel ug Dagohoy.
Niining bag-o lamang, sa nagkadako nga panginahanglan sa gatas sa Bohol, gitukod na usab ang ikaduhang milk processing facility sa Libertad Tubigon.
Ang bag-ong pasilidad mao na ang moalagad sa pagproseso sa gatas sa Tubigon,Carmen, Sagbayan< Danao, Clarin, San Isidro, Catigbian, Antequera, Balilihan, Corella, Sevilla, Sikatuna ug Batuan. (rahc/PIA-7/Bohol)
