By Rey Anthony Chiu | 03:14 PM April 11, 2022

Nagkinahanglan pa nga pangitaan og bag-ong ruta ang mga tore sa National Grid Corporation of the Philippines (NGCP) nga napukan dala sa landslide ug nkaangin sa pagkapawong sa suga sa Bohol.

Ug segun pa sa banabana sa mga tinugyanan, molanat pag duha ka adlaw, labing menos aron makasumpay og balik ang supply gikan sa grid paingon sa Bohol.

Gani, pasalig sa NGCP, ila ra nga ipahibaw kon may tukma na silang banabana kanus-a gyud makabarog ang ilang ERS aron masumpay na ang korente.

Kini ang kasayuran nga nasagap gikan sa mga tinubdan sa NGCP, nga kasamtangan pa nga nagsubay sa posible nga lain pang suliran sa napawong ng 138KV nga linya gikan sa Ormoc ngadto sa Maasin.

Kini usab nga linya ang gikuhaan sa Bohol sa iyang labing gisaligan nga suplay sa korente.

Matud sa tinubdan sa NGCP, ang ilang linya mismo sa bukiran nga bahin sa Baybay diin gipabarug ang tower no 111 ug ang duol nga mga towers niini ang nabugto dungan sa pagka kankan sa yuta dihang nagdahile ang yuta sa bukid sa Baybay Leyte ug nakaangin sa daghang molupyo didto.

Ang pagpanghasi sa bagyo nga si #AgatonPH, nga nagdala og dugay nga lanat sa uwan maoy nakaingon nga nahumokan ang yuta nga miresulta sa pagdahile niini ngadto sa kapatagan.

Niining mga sitwasyona, ang NGCP may andam na nga mga Emergency Restoration System (ERS) towers nga temporaryong ng ikapuli sa hagsak nga tore.

Apan sanglit nahumokan na ang gitarokan sa nabanlas nga mga tore, dili na pwede nga dinhi usab ipabarug ang temporaryo nga ERS towers sa NGCP.

Niini, gibanabana nga moabut pa sa labing dali, duha ka adlaw sa dili pa kapulihan ang napukan nga tore aron masumpay og balik ang linya sa Bohol. (rahc/PiA7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.