By Rey Anthony Chiu | 03:03 PM April 11, 2022

Naangin na usab ang linya nga kutay gikan sa grid tungod sa pag agi sa bagyo nga si Agaton.

Kini maoy rason sa pagkapawong sa serbisyo sa sugang dagitab sa mga nakapasiga na, dinhi sa Bohol, matud pa ni Betty Martinez tigpamaba sa National Grid Corporation of the Philippines (NGCP).

Nahsugod pagtrip ang 138KV line nga gikan sa grid, tadlas sa gibagyo nga lalawigan sa Leyte dayun tabok dinhi sa Bohol, alas 12:03 ganina, Abril 11.

Tungod kay kini nga linya maoy gisaligang tinubdan sa mas barato nga koryente sa BLCI, BOHECO I ug BOHECO II, kining mga power distributors, apektado gayud.

Dugang sa NGCP, ang duha ka linya sa 138kV nga nagtadlas sa Ormoc-Maasin Lines 1 and 2 ang nagtrip, tungod sa bagyo.

Ang pagtrip sa linya, mahimo nga paagi sa pagpanalipod niini nga walay dugang kadaut ang maangin kon magsige pa og pakutay sa koryente.

Mismo usa ka lukay nga masaghid sa linya, mahimo nang usa ka tinubdan sa pagtrip niini.

Dugang ni Martinez, nagpadayon na ang line inspection karon didto aron matumbok diing bahina ang nagkaproblema. (rahc/PIA7Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.