By Rey Anthony Chiu | 03:23 PM April 11, 2022

Bisan pa og tua na sa amihanan nga bahin sa Leyte ug kasadpang bahin sa Samar ang bagyo nga si Agaton, giisa pa gihapon ang Tropical Cyclone Wind Signal no. 1 sa ibabaw sa 10 ka lungsod sa Bohol.

Pabilin nga anaa sa Signal No 1 ang Candijay, Mabini, Alicia, Ubay, San Miguel, Pres. Carlos P. Garcia, Trinidad, Bien Unido, Talibon, ug Getafe bisan kon ang bagyo, anaa na sa ibabaw sa San Pablo Bay sa Tanauan Leyte.

Sa TROPICAL CYCLONE BULLETIN NO. 17 sa PAG ASA alang sa bagyo nga #Agaton” (MEGI)
nga gipagawas ganinang alas 5:00 AM, 11 April 2022, gibutyag nga ang bagyo hinay nga nag aginod ibabaw sa San Pablo Bay ganinang alas 4:00 sa kaadlawon sa coordinates nga
11.1°N, 125.1°E

Dala niining bagyoha ang lahutay nga huros nga moabut sa 65 km/h duol sa sentro sa bagyo ug kalit nga huros nga moabut sa 90 km/h, samtang nagaginod paingon sa kasadpan-amihanang kasadpan.

Hinuon, tungod kay moabut sa 180 kilometros ang kalapdon sa bagyo gikan sa sentro niini, nasulod pa ang amihanang Bohol, mao nga giisa pa ang storm signal no 1 didtong dapita.

Karong adlawa hangud ugma, gitagna nga ang bagyo mohinay og tuyok sa ibabaw sa amihanang kasubangan sa Leyte ug habagatang Samar ug Samar sa dili pa mogawas sa Philippine Sea ugma sa gabii kay mahigop sa kusog sa laing bagyo nga si Malakas. (rahc/PIABohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.