By Rey Anthony Chiu/PIA-Bohol | 06:34 PM August 23, 2021

Mga participant sa Agricultural Training Institute (ATI) sa Department of Agriculture.

Sa mga agriculturist nga nanginahanglan og dugang nga puntos sa Continuing Professional Development (CPD) aron makarenew sa ilang lisensya, dili na kinahanglan pang moadto sa layu alang niini.

Kini tungod kay ang Agricultural Training Institute (ATI) sa Department of Agriculture sa rehiyon 7 nga nagbase dinhi sa Bohol, gisangonan na sa Professional Regulations Commission (PRC) sa paghimo sa mga bansaybansay alang sa mga agriculturists aron makakuhag igo nga puntos sa pagrenew sa ilang mga lisensya, kini segun pa sa taho ni Doris Isabel Racho, information Officer sa ATI-7.

Tulo ka mga bansaybansay nga makahatag sa igo nga mga punto alang sa CPD aron makarenew ang mga agriculturists sa ilang lisensya, apan gilihok pa ang duha ug ang usa pa karon ang pwede nga ikahatag sa ATI, segun pa sa taho.

Bisan pa niini, matud ni Racho, malipayon sila nga taga ATI kay sapagka karon, certified service provider na sila, sugod niadtong Hulyo 26.

Ang CPD usa ka sistema nga gisagop aron dili mokubol ang kahibaw ug kahanas sa mga agriculurists kay niini, magpadayon ang ilang pagkat-on sa mga kahanas nga dala sa ilang propesyon subay usab sa sumbanan sa International Standard of Practice.

Niini, mapaseguro nga ilang katakus ug kahanas nga ikatampo sa pag-ugmad sa kaayohan sa katawhan ug komunidad lakip na ang nasud, dugang ni Racho.

Ang ATI, isip maoy training arm sa Department of Agriculture, natahasan sa pagtanyag sa libre nga agriculture trainings ngadto sa mga Agriculture Extension Workers (AEWs) aron magamhan sila sa mga katakus nga ilang magamit sa natad sa panguma.

Samtang ang mga AEWs mga lisensyado nga agriculturists, kinahanglan sila nga morenew sa ilang mga lisesnya matag tulo ka tuig.

Ang pagrenew sa ilang mga lisensya, magedepende usab sa ilag natigum nga mga CPD units nga ilang makuha sa mga bansaybansay nga ilang maapilan.

Matud sa ATI-7, ang kahigayunan nga makahatag kanila sa mga gikinahanglang giprograma nga mga bansaybansay nga lakip sa ilang CPD, daku nga kahigayunan sa mga propsesyonal nga agriculturists nga makakuha sa CPD aron makarenew sa ilang lisensya.

Gani, ang bansaybansay nga may katumbas nga puntos sa CPD, libre kini, butyag ni Reynadez L. Curayag-Agriculturist I sa ATI-7, subay sa taho.

Si Curayag mao usab ang Project Officer sa bansaybansay sa pagdumala sa cecid fly sa manga nga halos dili na madutlan sa pamatay-dangan o Training on Insecticide Resistance Management to Manage Cecid Fly in Mango.

Kini nga bansay maoy una nga bansay nga may katumbas nga CPD units nga na-accredit sa PRC, matud pa ni Racho.

Ang mosalmot sa nahisgutang bansaybansay maka-angkon sa 13 puntos nga gikinahanglan sa pagrenew sa lisensya sa pagka agriculturist.

Karon, gilihok pa usab sa ATI ang dugang bansaybansay nga ilang ipa accredit sa PRC, panapos ni Racho. (PIABohol/ATI-7)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.