By Rey Anthony Chiu/PIA-Bohol | 12:19 AM February 19, 2020

Mipadayag ang Department of Interior and Local Government (DILG) nga bisan pa kon nahuman na ang paghashas sa mga kalungsuran ug may listahan na sa mga nakapasar sa 2019 Seal of Good Financial Housekeeping (SGFH) mahimo gihapon sila nga modawat sa mga reconsideration.

Kini samtang 44 sa 46 ka kalungsuran sa Bohol ang nakapasar karon sa labing bag-o nga SGFH nga gipagawas sa DILG Pebrero 14, 2020, alang sa tuig 2019.

Matud ni DILG Director for Bureau of Local Government Supervision Odelon Pasaraba nga kadtong local nga mga kagamhanan nga wala mahi-apil sa lista, nga mopadala sa ilang letter request alang sa reconsideration ngadto sa ilang natungdan nga Regional Directors.

Dugang niya nga kon ang lokal nga kagamhanan buot nga mo-avail sa After Assessment Compliance, mahimo pa nila kini nga timbangaon pag–usab.

Hinuon, gitumbok ni Dir. Pasaraba nga kinahanglan nga mopasar ang nasampit nga LGU sa DILG MC No. 2014-13 isip mga criteria aron ang usa ka LGUs maapil sa mga kandidato nga makaparas.

Subay sa nahisgutan nga DILG MC, kinahanglang ang LGU makapakita sa sa labing bag-o nga Qualified o Unqualified opinion sa Commission on Audit (COA) ug kini nakamantala na sa COA website.

Ikaduha, kinahanglan usab nga makit-an sa DILG nga nakatuman na ang LGU sa panginahanglan sa Full Disclosure Policy (FDP).

Sa FDP, kinahanglan ang lungsod nga makapapatik sa ilang mga fiscal policies ug transaksyones sa 3 ka labing plastar nga lugar nga mabasa sa kadaghanan sa milabay nga duha ka kwarter usaby usab sa sertipikasyon sa Regional Director sa DILG ug sa usa ka Civil Society Organization (CSO).

Ikatulo, ang nahisgutan nga FDP kinahanglang nakarga na sa FDP portal sa DILG sulod sa duha ka labing bag-o nga kwarter.

Sa kinatibuk-an nga Bohol, mikabat karong tuiga sa 95.83 porsyento ang passing rate sa SGFH nga mas taas kon itandi sa nasudnong percentage nga naa ra sa 89%.

Sa tanang mga rehiyon, ang Region XI lamang ang nakakuha sa 100% sa ilang mga LGUs sa SGFH, samtang ang Bangsamoro Autonomous Region of Muslim Mindanao, dala sa mga suliran pa sa kahusay ug kalinaw, nakakab-ot lamang sa 69% nga nakakuha sa SGFH.

Matud sa DILG, ang SGFH, o nailhan kaniadto nga Seal of Good Housekeeping, usa lamang ka component sa Seal of Good Local Governance, ang labing hawod nga pasidungog nga makuha sa usa ka local nga pangagamhanan. (rahchiu/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.