By PR | 08:07 PM November 10, 2023
Ang kagamhanang probinsyal nakahipos og P1,985,623 gikan sa abang sa mga local government units ug private contractors alang sa mga ekipo ug kahimanan nga gipanag-iya niini.
Matod ni Engr. Abraham Clarin, ang hepe sa Provincial Motorpool Office, ilang gipahigayon ang pag-recondition o pag-ayom-ayom sa mga ekipo ug mga sakyanan lakip na kadtong gipasagdan kaniadto aron malikayan ang mga dugang galastohan.
Ang taho base sa datos nga gihatag sa Provincial Treasurers Office gikan sa Enero hangtod Oktubre karong tuiga.
Kini gibutyag ni Clarin atol sa The Capitol Reports niadtong Nobyembre 10 sa Kapitolyo.
Ang maong taho nagpamatuod sa seryoso paningkamot sa kagamhanang probinsyal ubos ni Gobernador Aris Aumentado nga ampingan ang panudlanan sa katawhan pinaagi sa pag-ayom-ayom sa mga sakyanan ug ekipo pga dugay nang wa mapusli.
Matud ni Motorpool administrative officer Agustin Aleria, ang kasamtangang gahin alang sa repair ug maintenance budget anaa pa sa sulod sa 80% cap.
“If gamay ta og gasto, nagpasabot nga healthy ang atong mga ekipo. Kung dako ta og gasto, nagpasabot na nga daghan ang nangaguba,” pagpasabot pa niya.
Dugang pa ni Aleria, kini tungod usab sa paningkamot sa buhatan sa pag-ayo ug pagmintinar sa mga ekipo ug mga sakyanan.
“By history, gamay ra ta og nagasto sa repair and maintenance, ug dili ta kahurot ug gasto sa budget nga gihatag sa (kagamhanan probinsyal) tungod kay gamay ra ang repair kay maayo ang pagka-maintain sa provincial motorpool sa atong mga ekipo.”
Si iyang bahin, gipaambit ni Engr. Si Eustaquio Caliao sa Provincial General Services nga ang ilang buhatan aktibong nagtrabaho sa pagdispatsar sa dili magamit nga mga ekipo ug mga propyedad nga dili na maayo diin usa sa iyang mga prayoridad sukad sa iyang pagtrabaho sa buhatan sugod niadtong Abril ning maong tuig.
Gisumite na sa buhatan ang listahan sa mga unserviceable nga ekipo ug propyedad nga dunay salvage value gikan sa PACCO aron iduso sa buhatan sa gobernador, ug ngadto na sa Commission on Audit sa dili pa ipaubos sa subasta o public auction.
Gipaambit usab ni Caliao ang bag-ong giduso sa ilang buhatan ang gitawag og Provincial General Services Information System (PGSIS)a ron digital na ang imbentaryo sa mga kabtangan ug kagamitan sa lalawigan.
Ang PGSIS anam-anam nga gipatuman sugod niadtong Nobiyembre 9 sa mga buhatan nga dunay kompleto nga datos sa physical inventory ilabi na sa kundisyon ini.
“Atong gi-encourage ang mga empleyado nga mahimo na ganing unserviceable ang maong equipment or property under their custody nga ila gyung i-uli aron updated atong records unya dili pod maglisod sila puhon inag retire nila kay basin dili na makit-an ang maong property inag retirement,” dugang niya.
Gibutyag usab ni Clarin nga adunay mga inisyal nga diskusyon kauban ni Aumentado ug mga opisyal sa Technical Education and Skills Development Authority (TESDA) sa pagtanyag og mga programa nga nagtutok sa pag-ayo sa mga heavy equipment.
Miuyon usab siya sa mga diskusyon kalabot sa mga re-fleeting program ilabina sa mga service vehicles nga gigamit sulod nA sa 10 ka tuig kay kasagarang dunay mga “safety concerns” sa maong mga sakyanan ug ekipo.
Ubos sa liderato ni Aumentado, aktibo nga giduso ang pagpalapad sa paggamit sa mga ekipo ubos sa reconditioning aron malikayan ang dugang gasto pagpamalit og bag-on, usa sa prayoridad sa Strategic Change Agenda. (PIMO/JSS)
