By Rey Anthony Chiu/PIA-Bohol | 07:05 PM January 30, 2020
Ang insidente sa Barangay Katipunan, Carmen, Bohol nga usa ka military truck ang mingbangga sa carenderia nga adunay mga estudyante ang naniudto. Usa ang patay samtang unom ang samdam sa maong insidente. Hulagway gikan ni Rusell Melicor

Giangkon sa mga tinugyanan sa Philippine Army ang responsibilidad ug ang mga kaakuhan sa mga tawo nga nadamay human ang ilang sakyanan nawad-an og preno ug midusmog ngadto sa usa ka karinderya sa Katipunan, Carmen.

“Niining nga hitabo-a, amo na nga gibuhat ang angay nga buhaton [sa mga angay manubag] sa aksidente ug amo nga gi-abaga ang tanan nga mga responsibilidad,” saysay ni Batallion Commander Lt Col Allan Tabudlo sa 47IB, ang inahan nga unit sa sundalo ug sa sakyanan sa military nga nadisgrasya.

Segun sa Spot Report sa Carmen Police Station pinaagi ni Acting Police Chief Police Major Jodel Torregosa, sa mga alas 12:45 sa udto niadtong Enero 29, 2020, usa ka Kia Truck nga sakyanan sa mga tropa sa kasundalohan ug gipanag-iya sa Armed Forces of the Philippines (AFP) ang aksidente nga nadusmog sa usa ka carinderia sa panahon nga tingpaniudto.

Subay sa imbestigasyon sa kapolisan, ang sakyanan sa military nga mas gamay sa 6×6 military transport, nagpaingon sa Batuan gikan sa Kampo sa 47 IB sa silingan nga Camp Rajah Sikatuna, sa Carmen, nawad-an og preno samtang nagdagan.

Ang military transport truck nga gimaneho ni Private Jay dela Torre, 24 anyos ulitawo nga taga Burias Mambusao Capiz, ug naghupot sa aktibo nga professional driver’s license, nagmaneho sa sakyanan paingon na sa Sawang Carmen, dihang napaltos ang preno pagliko ug didto ming lahos sa karinderya nga naa sa daplin sa karsada.

Didto sa karinderya may nanga-on ug pito ka buok niini ang na-angin sa pagkadusmog sa sakyanan.

Usa niini, 18 anyos nga si Roda Mae Niere, estudyante sa Grade 12 sa Katipunan National High School (KNHS) nga taga Fatima, Buenavista Carmen, ang na-igo ug nakabsan sa kinabuhi.

Lain nga naangol sa hitabo mao si Nelson Doro, 18 anyos Grade 12 sa KNHS nga taga MonteSuerte Carmen ang naputlan sa tiil dihang gidali og dala sa Gov Celestino Gallares Memorial Hospital (GCGMH).

Nakaangkon usab og angol ug bun-og sa lawas si Ria Mae Garcia, 18, Grade 11 sa KNHS nga taga Pilar, so Jomel Sarmiento, 18 Grade 11 sa KNHS taga Montesunting Carmen, ang gidala sa GCGMH.

Si Mary Grace Buñao, 18, Grade 12 sa KNHS taga Poblacion Norte Carmen, Si Laiza Jamil, 18, KNHS, taga Nuezafuerza Carmen, Jessa Baluca 18 anyos, Grade 12 KNHS taga Lapaz Carmen, ug ang sakay sa truck nga si Sgt. Roniere Parpan, 33 ug taga Surigao Norte nga naagol ug didto na dalha sa Cong. Simeon Toribio Memorial Hospital sa Carmen.

Naangin usab ang karinderia nga gipanag-iya ni Konsehal Brenei Rejas nga may lugar nga naguba dala sa aksidente.

Ang suspect nga si dela Torre, boluntaryo usab nga mitahan sa iyang kaugalingon sa kapolisan sa Carmen samtang ang sakyanan nga naaksidente, gidala sa kapolisan sa estasyonan alang sa tukmang mga lakang nga himoon.

Niini, matud ni LtCol Tabudlo nga ang “Philippine Army buot mopadangat sa among matinud-anon nga mga pahasubo sa banay sa estudyante nga naangil sa hitabo, ug sa wala damha nga pagkaangol sa uban pa nga mga estudyante.”

Dugang sa battalion commander nga nasayud sila nga ang pagpangayo og dispensa dili igo nga ikahupay sa kagul-anan sa mga banay nga nagbangutan.

Subay niini, dugang niya, kami sa 47IB, buot mopadangat sa among kasagmuyo nga dala sa wa damha nga aksidente nga nahitabo.

Agi og pasalig sa mga naangol, gipadayag sa commander sa mga kasundalohan nga “among gihimo ang among makaya nga makahatag og hinabang ug suporta sa mga biktima, apil na ang mga galastohan niini.”

Gawas pa, matud ni LtCol Tabudlo nga paningkamotan nila nga kalikayan na ang ingon niini nga aksidente nga mahitabo pag-usab.”

STATEMENT

“The Philippine Army would like to express our sincerest condolences to the family of the student who died because of what happened earlier.

Aside from her, unintentional harm has been brought to five other students. We are aware that our apologies would never suffice to console the grieving hearts of the families. Justifying the accident would only add insult to the injury.

Nonetheless, we from the 47IB, would like to say we are very sorry for the unfortunate circumstances the accident caused. In this dire moment, we are taking neccessary actions and taking all the responsibilities.

We are doing our best to extend assistance and support to those victims specially the expenses. Rest assured that we will do our best to prevent this incident in the future.”

– LTC ALLAN J TABUDLO GSC- (INF) PA, Battalion Commander, 47IB, 3ID

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.