By PR | 08:31 PM November 05, 2026
TAGBILARAN CITY — Lima ka lalawigan sa Pilipinas ang nakasinati na og huwaw tungod sa dugay nga kakulang sa ulan, sumala sa Philippine Atmospheric, Geophysical and Astronomical Services Administration (Pagasa).
Ang maong mga lalawigan nakaabot na sa meteorological drought, ang unang lebel sa klasipikasyon sa huwaw.
Kini nahitabo samtang gipahibalo sa Pagas ug sa mga internasyonal nga ahensiya sa pagbantay sa klima ang presensiya sa Very Strong El Niño sa Tropical Pacific.
Sumala sa Pagasa, gilauman nga magpadayon ug posibleng mokusog pa ang El Niño sa katapusang mga bulan sa 2026 hangtod sa unang unom ka bulan sa 2027.
Ang meteorological drought mao ang unang yugto sa huwaw nga gihulagway sa dugay nga kakulang sa ulan o pag-ulan nga ubos sa normal. Mahimo kining mosangpot sa agricultural drought, hydrological drought ug sa labing grabeng matang nga socio-ecological drought.
Ang lima ka lalawigan nga nakasinati na og meteorological drought mao ang Camarines Sur, Albay, Samar, Leyte ug Negros Oriental.
Samtang, 10 pa ka lalawigan ang nakasinati og taas-taas nga panahon nga walay ulan niadtong Oktubre. Lakip niini ang Sorsogon, Northern Samar, Masbate, Capiz, Negros Occidental, Bohol, Cebu, Agusan ug mga lalawigan sa Zamboanga Peninsula.
Gipataas sa El Niño ang posibilidad sa kakulang sa ulan nga mahimong hinungdan sa dugay nga huwaw sa nagkalainlaing bahin sa nasud.
Bisan pa niini, posible gihapon ang panagsang pag-ulan, ilabina sa mga lugar nga maapektuhan sa mga bagyong moagi, low-pressure areas ug uban pang sistema sa panahon nga makadala og ulan.
Alang sa Nobyembre 2026, gilauman nga kadaghanan sa mga bahin sa nasud makasinati og pag-ulan nga ubos sa normal. Dugang pang mga lalawigan ang posibleng maapektuhan sa huwaw ug dry spell hangtod sa katapusan sa bulan.
Gibanabana usab sa Pagasa nga masinati sa nasud ang mas taas nga temperatura kaysa sa naandang kasagaran sa mosunod nga mga bulan. —PIA-Bohol
