By PR | 08:45 PM July 07, 2026
TAGBILARAN CITY, Bohol —Gipalig-on sa provincial government of Bohol ang mga lakang sa biosecurity sa utlanan batok sa African Swine Fever (ASF) pinaagi sa pagpagawas sa Executive Order (EO) No. 28, aron mapalig-on ang mga paningkamot nga mapanalipdan ang industriya sa baboy sa probinsya—nga kasamtangang nag-ayo gikan sa epekto sa sakit—batok sa hulga niini.
Gipirmahan ni Gobernador Erico Aristotle Aumentado ang EO 28 niadtong Hulyo 3, 2026, human makumpirma ang mga kaso sa ASF sa Negros Island (Negros Occidental ug Negros Oriental), tungod sa panginahanglan nga mapanalipdan ang industriya sa baboy sa Bohol ug mapadayon ang malampusong pagbangon sa probinsya gikan sa maong sakit.
Ang EO, nga gipagawas subay sa Provincial Ordinance No. 2025-034, temporaryong nagsuspenso sulod sa 60 ka adlaw sa pagsulod sa Bohol sa mga buhi nga baboy ug uban pang mga produkto nga kontrolado ubos sa ordinansa nga gikan sa Negros Island, lakip na ang pag-isyu sa Certificate of Acceptance (CA) o bisan unsang katumbas nga clearance alang sa pagsulod sa probinsya.
Gipatuman kini nga lakang base sa rekomendasyon sa Office of the Provincial Veterinarian (OPV), human sa usa ka Technical Risk Assessment nga nagklasipikar sa Negros isip lugar nga adunay taas nga risgo (high external veterinary epidemiological risk) nga mahimong hinungdan sa pagsulod pag-usab sa ASF sa Bohol.
Magpabilin nga epektibo ang suspensyon gawas kung kini tangtangon, usbon, o lugwayan una pa mahuman ang gitakdang panahon, subay sa ordinansa ug uban pang angay nga mga balaod ug regulasyon.
Gimando usab sa EO ang estriktong pagpatuman sa mga veterinary quarantine checkpoint, gipakusog nga inspeksyon sa utlanan, ug hugot nga koordinasyon uban sa OPV, mga ahensya sa pagpatuman sa balaod, mga awtoridad sa pantalan, ug mga lokal nga unit sa gobyerno aron masiguro ang pagsunod niini sulod sa 60 ka adlaw.
Sa usa ka pahayag nga gi-post sa iyang opisyal Facebook page, si Gobernador Aumentado nanawagan sa publiko nga suportahan ang mga paningkamot sa pagpugong sa sakit sa pagsulod sa probinsya.
“Kabahin kini sa atong pagpaningkamot nga malikayan ang pagpakaylap sa ASF diri sa Bohol. Sa gihapon, magtinabangay kita sa pagpugong nga mokatag ang maong sakit sa atong probinsya,” panawagan ni Aumentado.
Gi-awhag usab sa gobernador ang mga magpapatigayon, transporter, meat vendors, ug ang publiko nga higpit nga tumanon ang veterinary quarantine regulations ug mga polisiya sa gobyerno aron matabangan ang Bohol nga gawasnon sa ASF ug maprotektahan ang industriya sa kahayupan sa probinsiya.
Dugang pa, gipalig-on usab ang coastal surveillance ug border biosecurity pinaagi sa koordinasyon sa OPV, Municipal ASF Inter-Agency Task Force, local government units, ug national law enforcement agencies.
Ang bisan unsang kargamento nga nagpadayon gikan sa Isla sa Negros nga mosulay sa pagsulod sa Bohol nga nakalapas sa EO ma-intercept sa mga personnel nga duly deputized.
Ang ma-intercept nga buhi nga baboy ipaubos sa documentary verification, veterinary inspection, movement verification, animal traceability, veterinary epidemiological risk assessment, ug ang pagkolekta sa ASF diagnostic samples para sa laboratory examination.
Bisan kinsang tawo nga mapamatud-an nga nakalapas sa gi-isyu nga EO kinahanglan nga ipaubos sa angay nga aksyon sa ilawom sa Provincial Ordinance 2025-034 ug uban pang magamit nga mga balaod ug regulasyon.
Dugang pa, ang EO naghatag usab og provincial operational protocol alang sa pagdumala sa mga natanggong nga buhi nga baboy, interim veterinary quarantine holding facilities, ug mga lakang sa pagpalig-on sa municipal ASF Inter-Agency coordination and enforcement. (ECB/PIA-7 Bohol)
