By PIA-Bohol | 09:42 AM April 23, 2026
TAGBILARAN CITY—Dugang rason ngano nga kinahanglan seryosohon ang programa sa rabies dinhi: wala makaabut sa globally accepted guidelines nga abton sa 70 porsyento ang mabakunahan nga iro sa kinatibuk-ang populasyon niini sa usa ka lugar, aron mapugngan ang pagkatap sa makamatay nga kagaw.
Segun sa taho didto sa Joint Meeting sa Sangguniang Panlalawigan Committee on Public Accountability ug SP Committee on Health and Public Sanitation, sa nalista nga 205,936 ka mga iro nga nia sa Bohol, 104,389 lamang ang nabakunahan gikan sa Enero ngadto sa Abril.
Kini, anaa lamang sa 50.69 porsyento, hinungdan nga rabies nagpabilin pa gihapon nga usa ka public health problem sa Bohol.
Segun sa World Health Organization, ang iro maoy nagpabiling labing kuyaw nga agi-anan sa rabies ngadto sa tawo.
Ug kon ang iro mabakunahan batok sa rabies, mawad-an na kini sa epektibo nga pagpasa sa kagaw ngadto sa tawo o sa isig ka iro.
Apan, ang pagpamakuna sa tanan nga iro, dili na kinakanglan, kay matud sa mga batid sa sakit, ang pagbakuna hangtud maabut na ang herd immunity, mahimong makapugong na sa pagkatap sa sakit.
Niini, gitarget sa Bohol ang pagpabakuna sa 70 porsyento sa kinatibuk-an nga populasyon sa iro dinhi sa Bohol, gikan sa itoy nga tulo ka buwan ang edad gikan sa pagpanganak,matag tuig, subay sa herd immunity.
Apan sa mga nagpanghitabo nga mga katikaran sa Bohol lakip na ang pagdagsang sa Covid-19, kakuwang sa bakuna ug uwahi nga pagdeliver sa bakuna, lakip na usab ang kapakyas sa mga kalungsuran sa pagsuporta sa kalihukan, nagpaubos sa accomplishment sa pamakuna, segun sa mga tinubdan.
Tungod niini, padayon nga gituki sa mga tinugyanan sa Bohol ang pagpa-update sa ordinansa batok sa rabies aron may tataw na nga kabasehan ang katawhan sa pagpadagan sa programa. (PIABohol)
