By Rey Anthony Chiu/PIA- Bohol | 12:42 AM September 17, 2021
Gikalipay sa mga taga Rizal Batuan Bohol ang napabag-o nga sistema sa paghimo og plano pangkaugmaran sa ilang barangay, butang nga karon mahimo na nilang angkonon nga sila gayud ang naghimo ug ilang hinaguan.
Didto sa Dagyawan sa Barangay: Talakayan at Serbisyo Caravan niadtong Septembre 14, gipadayag sa mga taga Rizal Batuan ang kaikag nga trabahoon ang pagduso sa ilang mga plano aron kapundohan sa mga ahensya sa kagamhanan, alang sa ilang kaayohan.
Ang Dagyawan, matud pa ni Department of Interior and Local Government Bohol Provincial Director Jerome Gonzales, ang Dagyawan may higayon nga ang komunidad molingkod aron debuhoon ang ilang mga laraw sap ag-ugmad sa ilang lugar.
Kini, matud niya, sahi sa naandan kaniadto nga ang mga ahensya sa goberno maoy kasagaran magpahamtang sa mga proyekto ngadto sa kabarangayan.
Kini nga karaang nga Sistema, kasagaran maoy kinasugdanan sa pagpasagad sa mga proyekto ug imprastraktura nga gipabarug sa barangay, tungod kay walay pagbati nga lakip ang komunidad niini.
Sa Talakayan sa mamamayan nga parte sa Dagyawan, pinaagi sa paggiya sa mga taga DILG, Dungan nga tun-an sa barangay ang ilang mga kahinguhaan, ug gikan dinhi, mugnapn ang plano nga pangkaugmaran, segun sa panginahanglan sa kadaghanan, dugang pagpasabut ni PD Gonzales.
Barangay nga kanhi gituok sa kalisang tungod sa presensya sa mga rebelde nga walhon, ang Rizal karon hinay na nga miliskuhag gikan sa gapos sa kahadlok sa mga kauban sa barangay nga naglihok sa komunista nga ideyolohiya kaniadto.
Apan, human nakahukom ang barangay nga talikdan na ang ngi-ob nga kagahapon, didto n nila nasinati ang presensya sa kagamhanan nga nanalipod sa ilang mga katungod.
Dak una kayo og kalinan, butyag ni Kapitan Rolando Pataca, samtang nagsud-ong sa mga ka taga barangay nga nagpila alang sa hinabang ug nga serbisyo nga gidala sa mga nasudnong ahensya sa kagamhanan ngadto sa iyang barangay.
Gawas sa mga hinabang nga gikan sa Department of Social Service and Development (DSWD), Department of Agriculture, Office of the Provincial Agriculture, Lokal nga kagamhanan, servisyong medical gikan sa Department of Health ug sa Medical Outreach Unit sa Kapitolyo, libre nga tupi sa Philippine national Police ug Philippine Army, may gilusad usab didto nga Barangayanihan sa PNP.
Apan mas nahinam ang kadaghanan sa pagpamati sa mga nasudnong ahensya sa kagamhanan nga mihatag sa ilang mga commitment sa mga proyekto nga gilaraw sa barangay nga ilang kinahanglanon.
Gitumbok sa mga taga didto ang pagpahiluna sa Covered Court sa ilang mini-public market ug Barangay Hall, pagpatukod og dugang tunghaan sa Rizal Elementary ug Rizal National High School, ug mga farm to market roads nga mopasayon sa pagsulod sa mga sakyanan sa hilit nga lugar sa barangay.
Hinuon, gipasabut usab sa mga representante sa mga ahensya nga ang mga proyekto nga gisugyot, iduso una isip proposal nagdto sa mga buhatan sa DPWH, DepED, DA ug ubang ahensya nga may mga pundo nga gitagana alang niini.
Niini, gipanaad sa mga opisyal sa barangay nga ilang pangunahan ang pagduso sa mga proyektong ilang gipili, alang sa pagpundo niini, sa bisan asa nga ahensya sa kagamhanan nga natungdan. (rahc/PIA-7/Bohol)
