By PIA-Bohol | 10:11 PM February 16, 2026
TAGBILARAN CITY, Bohol—Makuha sa sakop sa Social Security System (SSS) ang iyang gitigum nga pundo, sa higayon nga siya mo edad na og 60, sa duha ka pamaagi: pinaagi sa full lump sum kon wala siya makakompleto sa 120 ka kontribusyon sa pag-abut sa 60 anyos o edad nga moretire na, ug para sa mga nakakompleto sa 120 ka kontribusyon: ang binuwan nga pension sa tibuok kinabuhi.
Kini maoy gipasabut sa SSS pinaagi ni senior communications analyst Sherwin Dan Solibaga, didto sa Kapihan sa PIA, samtang nagpasabut sa mga programa sa ahensya nga gitahasan sa social security sa mga trabahante sa pribadong sector ug sa mga sakop nga self-employed.
Subay sa Republic Act No. 11199, o Social Security Act of 2018, kini nagmandu sa pugos ug automatic nga SSS coverage sa tanan nga empleyado sa pribadong sector nga wala pa moabut ang pangedaron og 60.
Nahi-apil na niining nasampit nga balaod ang mga katabang sa balay (kasambahays o domestic workers) ug overseas Filipino Workers.
Subay sa nahisgutan nga balaod, ang mga employers gimanduan usab sa balaod sa pagparehistro sa ilang mga empleyado ug pagremit sa binuwan nga kontribusyon, alang sa pagka-member sa trabahante sugod sa unang adlaw sa iyang pagtrabaho.
Ug alang sa mga trabahante nga may P5000 nga binuwan nga salary credit (MSC), may binuwan nga kontribusyon nga P750, diin ang P250 ang bayaran sa trabahante ug ang P500 bayaran sa iyang employer.
Sa mga katabang, ang binuwan nga kontribusyon subay sa P1,000 nga binuwan nga salary credit: P150.
Sa mga sakop sa SSS, kadtong makahatag sa kinatibuk-an nga 120 ka kontribusyon o sulod sa 10 ka tuig, may pundo na nga igo ikahatag alang sa binuwan nga pension, sugod sa panahon nga kaaprobahan na ang iyang retirement application.
Sa mga makaretire nga sakop sa SSS o kadtong makakompleto sa 120 ka kontribusyon, mahimo usab nga mopili sa pagkuha og una sa pipila ka buwan nga pension, apan kini sundan pa gihapon sa pension sa tibuok kinabuhi.
Sa mga trabahante nga wala makakompleto sa 120 ka kontribusyon, kon mo-edad na og 60, mahimo niining kobrahon ang kinatibuk-an nga kontribusyon apil na ang interes, pasabut sa SSS. (PIABohol)
