By PR | 04:33 PM June 08, 2025
Duha ka giingong drug personality ang nasikop sa gihimong buy-bust operation sa City Drug Enforcement Team (CDET) sa Tagbilaran City Police Station sa Purok 4, Barangay Cabawan, Tagbilaran City kagabii, Sabado, Hunyo 7.
Giila ang mga suspetsado nga sila alyas Proco, 39 anyos, mekaniko sa motorsiklo, residente sa Purok 3, Brgy. Biking, Dauis, Bohol og alyas Doking, 48 anyos, walay trabaho, residente sa Brgy. Anislag, Maribojoc, Bohol ug lumad sa Brgy. Catagbacan, Loon, Bohol.
Ang operasyon gipangulohan ni Police Master Sergeant Proceso A. Paragoso Jr., ubos sa direktang pagmando ni Lt. Col. John Kareen Oliveros Escober, hepe sa Tagbilaran City Police Station.
Nakuha gikan sa mga suspetsado ang upat ka dagkong sachet ug duha ka medium-sized sachet nga adunay puti nga kristalinong substansya nga gituohang shabu, nga may gibug-aton nga mga 500 gramos ug gitagna nga kantidad nga P3,400,000 base sa Standard Drug Price (SDP).
“Kini nga kalampusan bunga sa atong padayon nga gipanghingusgan nga kampanya batok ilegal nga druga. Gidayeg nato ang maong team sa ilang pagkugi ug kadasig sa serbisyo,” matod ni Col. Arnel Bañzon, provincial director sa Bohol Police Provincial Office.
“Nag-awhag kami sa publiko nga padayon kamong mosuporta sa among kampanya pinaagi sa pagsumbong sa mga kalihokan nga kadudahan labi na sa illegal na droga. Ang pakigbatok sa druga usa ka kolektibong responsibilidad,”
dugang pa ni Lt. Col. Norman Nuez, tigpamaba sa BPPO.
Ang mga suspetsado anaa na karon sa kustodiya sa kapulisan ug atubangon ang kaso ilawom sa Republic Act 9165 o ang Comprehensive Dangerous Drugs Act of 2002.
