By PIA-Bohol | 07:58 PM May 09, 2025
Fake news ang social media post nga nikatap kalabot sa pasidaan batok sa pagbilin og blangko o pag-undervote sa balota.
Kini ang gi-klaro sa Commission on Elections (Comelec) pipila ka adlaw sa dili pa ang 2025 midterm elections.
Matud pa sa Comelec nga ang pag-UNDERVOTE usa ka desisyon nga ang botante lamang ang angay mohimo.
Giingong walay angay ikabalaka ang mga botante tungod kay sila mismo ang magpasulod o mag-feed sa ilang balota sa Automated Counting Machine (ACM).
Pagsulod sa ballot, ma-review sa botante ang ballot image sa screen ug ipagawas ang Voter-Verified Paper Audit Trail (VVPAT) nga mahimong susihon sa dili pa kini ihulog sa receptacle.
Giseguro sa Comelec nga walay oportunidad ang mga giingong “dirty tricks group” nga bag-ohon ang boto sa mga botante tungod kay pag-feed pa lamang sa balota nakatala na kini sa ACM.
Gipahinumdoman usab sa komisyon ang tanan nga ang pagpakatap og bakak, maka-alarma nga mga impormasyon usa ka Election Offense ubos sa Section 261(z)(11) sa Omnibus Election Code. (ECB/PIA7-Bohol)
Taliwala sa mga nikatap nga bakak ug maka-alarma nga mga impormasyon, nagpahinumdom ang Comelec nga kini usa ka Election Offense ubos sa Section 261(z)(11) sa Omnibus Election Code.
