By PR | 01:31 PM March 07, 2023
Nagpatawag og emergency meeting si Gobernador Aris Aumentado kagahapon, Marso 6, kabahin sa kahimtang sa African Swine Fever (ASF) sa lalawigan.
Mintambung ang nagkalain-laing mga head of office ug ang ubang mga ahensya nga direktang may kalambigitan sa pagpatuman sa mga lakang nga pagabuhaton agi og pagpangandam.
Naka-angkla ang mga kukabildo sa Executive Order No. 52, series of 2022 “Constituting the Bohol African Swine Fever Inter-Agency Task Force in the Province of Bohol” nga mahimong pagatawgon usab nga Bohol ASF Task Force diin si Aumentado mao ang over all chairman niini.
Septyembre 22, 2022 gilagdaan ni Aumentado ang usa ka ordinansa nga aprobado sa Sangguniang Panlalawigan Septyembre 13, 2022-Provincial Ordinance No. 2022-011 “Prohibiting the Entry of Live Pigs, Pork, Pork Products and Frozen Semen Coming From the African Swine fever (ASF) Affected Areas and Providing Penalties thereof.”
Sa maong urgent meeting gipasabot sa gobernador nga gikinahanglang paspasan ang pagpangandam sa posibleng ASF entry sa probinsya sa Bohol apan palig-onon ang mga stratehiya pagpugong sa maong entry.
Mahinumduman nga naalarma ang Task Force human nakaabot sa ilang buhatan ang gihugon-hugon nga pagkamatay sa mga baboy sa Cebu ug ang posibilidad nga nakasulod na ang ASF sa Sugbo.
Pag-awhag ni Dr. Stella Marie Lapiz, ang hepe sa Office of the Provincial Veterinarian, nga gikinahanglan ang doble nga pag-amping ug ang pagmonitor ilabina sa mga coastal areas kay walay igong kapasidad sa monitoring ang OPV sa mga kabaybayonan.
Usa sa problema sa OPV mao nga usa lamang ang ilang PCR test alang sa mga breeders nga musulod sa probinsya ug kini anaa sa Ubay.
Igo usab ang suplay sa baboy sa lalawigan maskin i-ban pagkakaron ang pagsulod sa baboy nga gikan sa gawas sa probinsya. Adunay sufficiency level up to 271 %.
Sa Sugbo, sa sampling nga gipahigayon sa 149 ka baboy nga nangasakit, 58 niini ang positibo sa ASF. Hinuon wala pay pormal ug opisyal nga kompirmasyon bahin niini.
Kasamtangang anaa sa “Green level” ang Bohol, nga buot pasabot wala pay nakasulod nga ASF.
Si Aumentado nagkanayon nga kung makasulod kini sa Cebu, ang Bohol nalang ang nagapabilin nga anaa pa sa green, diin matod sa gobernador kritikal nga sitwasyon.
Gipursigi sa gobernador ang paspas nga pagpakatag og impormasyon sa kadaot nga dala sa ASF ug iyang gimando ang pagpakatap og mga tarpaulin ug uban pang mga IEC ngadto sa mga lugar nga sagad daghan og taw sama sa mga pantalan, mercado ug uban pa.
Namahayag si provincial administrator Aster Caberte nga gikinahanglan pamultahon sa nakalatid sa balaodnon nga P5,000.00 ang musupak aron masabtan sa publiko nga seryoso ang kagamhanan bahin sa ASF.
Apil nga gihisgutan ang pagmulta sa mga pasahero ug pagconfiscate kung dunay gidala sa maong ginadili sa barko apil na ang kapitan sa barko ug uban pang lambigit kung adunay masakpan nga dili mutuman sa balaodnon bahin sa ASF gikinahanglan multahan.
Apil na usab niini ang mga Airlines. Bisan ang mga truck nga musulod sa Bohol gikinahanglan paniguruon nga dili magdala og bisan unsang pork related nga pagkaon. Ang truckboy, ug driver niini pamultahon kung masakpan. Si bisan kinsa nga pamultahon apan dili mubayad, pagadal-on ngadto sa presento pinaagi sa PNP ug ubang awtorisado nga ahensya. Apan ang mubayad gikinahanglan ang presensya sa municipal o provincial treasurer alang sa maong transakyon.