By PIA-Bohol | 10:31 PM March 24, 2025
Nangandam na ang Bohol alang sa lain na usab nga hugna sa evaluation sa mga programa niini sa nutrisyon, kini maoy gipaambit sa Provincial Nutrition Council, didto sa tigum niini sa Provincial Health Office Conference Hall, Marso 24.
Matud ni Assistant Provincial Health Officer Dr. Greg Sodusta, kini nga evaluation, kon mamaayo ang resulta, magtanyag na usab sa Bohol sa ikatulo nga Green Banner Award sa Nutrition sa Rehiyon 7.
Gikan niini, mahimong tanyagan ang Bohol sa Consistent Regional Outstanding Winner in Nutrition, kon ugaling makuha gihapon sa Bohol ang taas nga marka niining evaluation nga mahitabo sa sunod buwan, dugang ni Dr Sodusta.
Ang Bohol nakakuha na usab kaniadto sa CROWN awards, ug buot niini nga makuha kini karon aron makaabut na usab sa nasudnong awards nga itanyag sa National Nutrition Council.
Si Glenda Grafilo, kinsa maoy Provincial Nutrition Action Officer, sa paggiya ni Provincial Health Officer Dr. Fruserma Mary Uy, mibutyag nga subayon sa evaluation team ang mga kalungsuran aron tukion ang pagpatuman sa mga mrograma sa nutrisyon, ug magpili sa duh aka barangay sa matag lungsod nga subayon ang mga plano ug kalihukan sa nutrisyon.
Ang Nutrition Evaluation sugdan sa Abril 7 ug taposon sa katapusan sa buwan. Tungod niini, giaghat ni Grafilo ang mga Municipal ug Barangay Nutrition Councils sa paghipno na sa ilang mga dokumento ug mga programa nga ipakita isip pruweba sa maayong programa sa nutrisyon. (PIABohol)
