By PIA-Bohol | 08:23 PM January 17, 2025
Ang Department of Migrant Workers (DMW) niadtong Lunes hugot nga nipahimangno sa mga overseas Filipino workers (OFWs) nga magmatngon sa mga illegal recruitment schemes nga naglihok ubos sa “third country recruitment”, partikular na sa social media platforms.
Ang ahensya mihimo sa pamahayag human ang grupo sa mga Filipino gisikop sa Abuja ug Lagos sa Nigeria sa mga alegasyon sa cybercrime, economic sabotage, ug mga paglapas sa mga balaod sa imigrasyon sa nasud.
Ang DMW nagkanayon nga ang Philippine Embassy sa Abuja mitaho sa posibleng human trafficking nga mga insidente nga naglambigit sa mga Filipino ngadto sa Nigeria ug ubang mga nasud sa West Africa.
Kini nga mga Filipino gi-recruit aron mobiyahe sa Nigeria gikan sa Dubai, United Arab Emirates, gamit ang tourist visas ug gipatuo nga ang ilang permit maproseso sa ilang pag-abot sa Nigeria, matud sa news release nga gipagawas sa DMW.
Matud pa nga ang gobyerno sa Nigeria wala magtugot sa pagbag-o sa mga visa sa turista alang sa katuyoan sa pagpanarbaho.
Ang DMW nagkanayon nga ang Nigerian government hugot nga nag-require sa tanang langyaw nga mga trabahante, apil na ang mga Filipino, nga makakuha og Subject to Regularization (STR) visa gikan sa Nigerian Embassy sa Pilipinas sa dili pa mosulod sa nasud aron manarbaho.
Iligal alang sa mga trabahanteng Pilipino ang pagsulod sa Nigeria gamit ang mga tourist visa sa tuyo nga makakuha og trabaho human sa pag-abot.
Samtang ang mga dokumento sa panarbaho sa gawas sa nasud mahimong makuha pinaagi sa DMW-accredited recruitment agencies aron masiguro ang mga benepisyo sa mga mamumuo, lakip ang proteksyon gikan sa labor malpractice ug tabang kung adunay emerhensya.
Ang ‘3rd country recruitment’ scheme nagtarget sa mga OFW nga na-deploy na sa ilang destinasyon nga mga nasud ug nag-recruit kanila sa pagtrabaho sa laing nasud, nga nagsaad og mas taas nga sweldo nga mga trabaho.
Ang DMW niingon nga ang mga OFWs kinahanglan kanunay nga mas mabinantayon, labi na batok sa mga kadudahang tanyag nga trabaho sa gawas sa nasud sa mga platform sa social media.
Gi-awhag usab sila nga i-report dayon ang bisan unsang kadudahang recruitment nga kalihokan ngadto sa tagsa-tagsa ka Migrant Workers Office (MWO) ug Philippine Embassy nga adunay hurisdiksyon sa ilang job site.
Samtang ang bisan unsang kadudahang kalihokan bahin sa illegal recruitment ug human trafficking mahimong i-report sa DMW Migrant Workers Protection Bureau pinaagi sa ilang Facebook page sa https://www.facebook.com/dmwairtip, email sa mwpb@dmw.gov.ph o pinaagi sa ilang hotline number +63 2 8721-0619 alang sa legal nga tabang. (ecb/PIA7-Bohol)
