By PIA- Bohol | 09:09 AM January 17, 2025
Sugod sa Enero 20, 2025, ang tanang mga sakyanan nga mosulod sa lalawigan sa Bohol pinaagi sa mga pantalan ipaubos na sa mandatory inspection sa Canine Unit sa Office of the Governor.
Subay kini sa Executive Order No. 31, Series of 2023, nga gilagdaan ni Gobernador Erico Aristotle Aumentado, aron masumpo ang pagdagsang sa ilegal nga drugas, pagpalambo sa kaluwasan sa publiko, ug pagmintinar sa kalinaw ug kahapsay sa probinsiya.
Dugang pa, ang mga gibansay nga handler ug mga iro ipakatap sa mga pantalan aron masiguro ang pagsunod ug pagsuporta sa kaluwasan sa publiko sa una ug bugtong UNESCO Global Geopark ug Regenerative Island sa nasud.
Ang mandatory inspections nagtumong sa pagsumpo sa pagpayuhot sa ginadiling droga pinaagi sa mga sakyanan nga gisakay sa roll-on-roll-off (RORO) vessels.
Kining pahibalo nunot sa bag-o nga kalampusan sa Bohol Police Provincial Office (BPPO), nga nakasakmit og kapin sa P15 milyones nga kantidad sa gituohang shabu sa duha ka managlahing buy-bust operations.
Niadtong Enero 10, usa ka buy-bust operation sa Barangay Dao sa lungsod sa Dauis ang nakarekober sa kapin duha ka kilo nga shabu nga mobalor og P13.7 milyones.
Paglabay sa tulo ka adlaw, nasakmit usab sa mga otoridad ang 265 gramos nga shabu sa Barangay Bool sa dakbayan sa Tagbilaran, nga nagkantidad og P1.8 milyones.
Sa Facebook post, gidayeg ni Gob. Aumentado ang maong operasyon sa kapulisan.
“Kini nga operasyon, uban sa daghan pa nilang kalampusan, nagpamatuod nga seryoso ang atong Pangagamhanan sa paglimpyo sa komunidad batok sa impluwensya sa ilegal nga droga,” matud pa ni Aumentado sa iyang Facebook post.
Tungod niini, nanawagan ang gobernador sa publiko nga mo-kooperar niini nga inisyatiba aron makatabang sa pagsiguro sa luwas ug drug-free nga palibot alang sa tanang Boholanos, sumala sa prayoridad sa iyang Strategic Change Agenda.
“Padayon ta nga magtinabangay alang sa maayong kawsa. Ang kalampusan nagagikan sa hiniusang pagpaningkamot ug suporta sa tanan,” dugang ni Aumentado. (ecb/PIA7-Bohol)
