By PIA-Bohol | 08:28 PM January 17, 2025
Ang Department of Department of Social Welfare and Development (DSWD) niadtong Lunes nipahibalo nga nipagawas na sila sa guidelines alang sa pagpatuman sa First 1,000 Days (F1KD) sa Life conditional cash grant ubos sa Pantawid Pamilyang Pilipino Program (4Ps).
Matud pa ni DSWD Assistant Secretary Irene Dumlao, pinaagi sa paghatag sa 4Ps F1KD grant ngadto sa mga kwalipikadong benepisyaryo, ang departamento makahimo sa pagpalambo sa health-seeking behavior sa 4Ps beneficiaries ug unahon ang panginahanglan sa mga bata aron malikayan ang stunting ug malnutrition.
Ang 4Ps F1KD cash grant usa ka dugang pinansyal nga tabang nga nagtumong sa pagtabon sa importanteng galastuhan sa panglawas ug nutrisyon niining kritikal nga panahon sa kinabuhi sa bata.
Ang mga guidelines nalatid sa DSWD Memorandum Circular No. 1 series of 2025 nga gilagdaan ni Secretary Rex Gatchalian niadtong Enero 6.
Ang bag-ong guidelines, matod ni Dumlao, nagtumong sa paghatag og binuwan nga health grants nga nagkantidad og P350 sa mga babaye nga benepisyaryo sa 4Ps nga mabdos, ug mga panimalay nga adunay mga anak gikan sa 0 ngadto sa 2 anyos.
Aron maseguro ang paborableng resulta sa panglawas alang sa 4Ps nga mga inahan ug ilang mga anak, si Dumlao miingon nga ang 4Ps F1KD grants adunay mga kondisyon nga nahiuyon sa pagpatuman sa Republic Act 11148 o ang Kalusugan at Nutrisyon ng Mag-Nanay Act ug kasamtangan nga mga protocol sa Department of Health (DOH).
Ang mga kondisyon naglakip sa pag-access sa mga serbisyo sa pre-natal sa DOH-accredited nga pasilidad sa panglawas, pagsubay sa pagmabdos ug pagdawat sa mga serbisyo sa pag-atiman sa ante-natal, pagpanganak sa usa ka pasilidad sa panglawas nga akreditado sa DOH, pagtambong sa mga post-natal nga pagbisita, pag-apil sa mga sesyon sa pagtambag, ug pagkuha og micronutrient supplements ug immunizations, ug uban pa.
Sa bahin sa monitoring, si Dumlao miingon nga ang mga hingtungdan nga pasilidad sa panglawas maoy magdeterminar kung ang mga target nga benepisyaryo nagsunod ba o wala sa mga kondisyon sa 4Ps F1KD, nga maoy basehan sa pagpagawas sa binuwan nga cash grants.
Sa mga kaso kung ang pagsunod sa mga kondisyon sa 4Ps F1KD nahimong hilabihan ka mahagiton o lisud alang sa mga benepisyaryo nga nagpuyo sa geographically isolated and disadvantaged areas (GIDAs), ang hingtungdan nga health worker kinahanglang magdeterminar sa mga lakang aron maseguro nga ang gikinahanglan nga health ug nutrition interventions mahatag dayon ngadto sa mga hingtungdan nga benepisyaryo.
Ang 4Ps F1KD gikatakdang mo-epekto karong buwana. (ecb/PIA7-Bohol)
