By PR | 04:07 PM May 16, 2024
Gimandoan sa pamunuan sa Bohol Police Provincial Office (BPPO) ang tanang hepe ug police personnel sa mga kwerpo kalungsuran sa Bohol nga mohatag og impormasyon sa publiko sa mga nagkadaiyang panghitabo sa ilang lugar pinaagi sa mga sakop sa media.
Kini maoy gibutyag ni Col. Lorenzo Batuan, BPPO provincial director, pinaagi sa iyang deputy provincial director for operation nga si Police Lieutenant Colonel Mark Gifter Sucalit. Kini gibutyag ni Batuan atol sa press conference nga gihimo niadtong Mayo 15.
Si Sucalit mi-ingon nga mahinungdanon nga ipaabot sa publiko ang mga panghitabo dinhi sa Bohol aron masayran sa katawhan ang tinood nga sitwasyon pinaagi na usab sa mga sakop sa media.
Nangayo usab og despensa si Sucalit sa iyang nahibaw-an nga dunay mga police station nga magdumili sa paghatag og saktong impormasyon sa katawhan pinaagi sa interview sa mga media.
Kahinumduman nga nikunhod ang performance ug satisfaction rating sa BPPO base sa resulta sa HNU Bohol Poll. Matud pa ang publiko nakamatikod nga usa sa mga hinungdan sa paghagba sa rating mao ang kausaban sa mga palisiya sa kapolisan nga dili kaayo makahatag og saktong impormasyon.
Samtang kabahin sa paghagba sa rating sa Bohol PNP, si Batuan nagkanayon nga ilang gidawat kon unsa man ang nahimong resulta sa survey og magsilbi usab kini nga hagit sa ilang organisasyon aron ma-improve pa ang ilang performance.
Gipasalig usab ni Batuan nga palambuon pa nila ang pakig-alayon ngadto sa Publiko isip usa sa ilang tahas gawas pa sa paghatag og saktong seguridad alang sa kahapsay og kalinaw sa Bohol.
Samtang suma ni Batuan nga padayong makig-alayon ang buhatan sa BPPO labi na panglantaw ni Gobernador Aris Aumentado pag abot sa kahapsay ug kalinaw sa lalawigan. Diin nagpabilin pa gihapon ang Bohol nga ikaduha sa pinaka malinawon nga probinsiya sa tibuok Pilipinas. (PIMO/AT)
