By Marisol Bo-oc | 01:50 PM May 15, 2024
Nanawagan karun ang pulisya sa publiko sa pagtabang nga mailhan ang naka-hit-and-run sa pamilya nga nag-motorsiklo nga sakay ang 7 anyos nga nakabsan sa iyang kinabuhi kagabii (Mayo 14, 2024) sa Poblacion, Sikatuna.
Pasado 8:40 gabii, padong moliko sa wala ang motorsiklong gisakyan sa magtiayong Eliezer, 29, ug Jecjec ug ilang 7 anyos nga batang lalaki apan kalit nga napunggit sa nagsunod nga naghaguros nga van.
Gidali og dala ang bata sa Gov. Celestino Gallares Memorial Medical Center sa Tagbilaran City apan nakabsan gyud sa kinabuhi ang bata. Naangol ang iyang papa ug mama, kinsa giingong nagsabak og lima ka buwan.
Mingsutoy lang ang van nga padong sa Loboc. Wala kini mohunong aron tabangon ang nabanggaan niini.
Pagkakaron gipangita pa ang van ug ang driver niini.
Sa adunay impormasyon, kontaka ang Sikatuna Police Station hotline number 09985986439.
