By PR | 11:17 AM May 09, 2024
Wa mahasol si kanhi Presidente Rodrigo Duterte sa mga taho nga posibleng ipagawas ang warrant of arrest batok kaniya sa International Criminal Court (ICC).
Sa usa ka text message ngadto sa The Star, si manlalaban Harry Roque, kanhi tigpamaba sa kanhi pamuno nasud, nagkanayon nga “way hinungdan ug way pulos” ang maong warrant.
Matud pa ni Roque, iyang nasayran nga way gibuhat ang administrasyon ni Presidente Ferdinand Marcos Jr. sa pagsud sa nasud sa mga imbestigador sa ICC.
Natinga usab si Roque sa padayon nga pagdumili sa administrasyon nga ibutang sa papel ang gibuhian nga baruganan ni Presidente Marcos kabahin niini nga nagdumili sa paghatag og kooperasyon sa ICC.
“Among nasayran nga dihang miabot ang mga imbestigador sa ICC, nga usa na ka paglapas sa atong soberenidad, wa sila pugngi sa pag-imbestigar,” matud pa ni Roque nga usa sa mayhap sa tudlo nga mga manlalaban nga mahimong manlaban sa ICC.
Dugang pa niya, gipasud sa Bureau of Immigration and mga imbestigador bisan pa nga wa gitago niini ang tinuod nila nga katungdanan.
“Wa nila itago ang ilang pagkatawo, mao nga duna kitay pruweba sa ilang pag-abot ug pagbiya,” nagkanayon si Roque.
Wa niya ibutyag kon kanus-a miabot ang mga imbestigador apan midugang nga kini human gipasa sa Ubos Balay Balaoranan ang resolution niadtong Nobyembre nga nag-awhag kang Presidente Marcos nga mo-kooperar sa ICC.
Sa pikas bahin, si kanhi Executive Secretary Salvador Medialdea nagkanayon nga nabatasan na nga mopatim-aw ang issue sa ICC matag higayon nga nag-atubang og daku nga isyu ang administrasyon.
Di pa dugay, usa ka kanhi ahente sa Philippine Drug Enforcement Agency (PDEA) mibutyag nga gisugdan na unta ang paglit-ag sa Presidente niadtong 2012 dihang usa pa siya ka senador tungod sa kalambigitan sa gidili nga droga.
Gipanghimakak kin isa PDEA apan mismo si Senador Ronald de la Rosa niangkon nga tinuod ang mga dokumento kabahin sa himoon unta nga raid nga wa madayon tungod kay gipakgang kini.
Matud pa ni Medialdea, murag mao kini ang pamaagi sa pagpanimalos pinaagi sa pagpaukyab sa ingon niini nga panghitabo.
Si Medialdea nagkanayon nga di na kini tagdon ni PRRD ang mga taho nga sama niini.
