By PR | 08:01 PM April 20, 2024
Kamahal sa presyo sa mga palaliton, nagkalisud nga ekonomiya ug korapsyon mao ang unang tulo ka mga suliran nga angay atimanon ni Presidente Ferdinand Marcos.
Kini sumala pa sa resulta sa survey nga gihimo sa Publicus Asia nga gihimo niadtong Marso 14-18.
Ang pangutana nga gipasupot ngadto sa mga respondents sa maong survey mao kini: pili-a ang labing mahinungdanong isyu nga angay tutokan ni Presidente Marcos.
Sa 1,500 ka mga tawo nga gipangutana, 15% ang mitubag nga ang kamahal sa presyo sa mga palaliton maoy angay unahon sa Presidente.
Parehong 15% ang nagkanayon nga ang ekonomiya kinahanglang hatagan og pagtagad ni Presidente Marcos.
Nagsunod niini ang suliran sa kurapsyon diin 13% nagtuo nga usa kini ka dakung suliran nga giatubang sa administrasyong Marcos.
Ang ikaupat nga suliran mao ang kawad-on nga giila sa 10% isip nag-unang suliran sa nasud karong panahona.
Gisundan kini sa suliran sa trabaho o kakuwang niini. Kadaghanan sa 9% nga namahayag nga daku kining suliran atua sa Northern ug Central Luzon, gisundan sa Visayas, National Capital Region, Southern Luzon ug Mindanao.
Laing suliran nga ginganlan sa maong survey ang agrikultura nga nagproblema karon di lang sa El Niño apan lakip usab ang kabarato sa presyo tungod sa pagbaha sa mga produkto nga gipayuhot gikan sa ubang nasud.
Ang kaubos sa sweldo o suholan sa mga kawani gipadangat usab ngadto kang Presidente Marcos ilabina sa pag-ubos sa peso kontra sa dolyar.
Usa usab sa dakung suliran nga giatubang karon mao ang edukasyon diin naglisud og tubag ang kagamhanan sa nagkadaku nga panginahanglan sa nagkadaghang tinun-an.
Nagsugod na usab ang kabalaka sa katawhan sa suliran sa iligal nga droga diin 4% nagtuo nga angay na kining sumpoon ni Presidente Marcos.
Konektado niini ang ikanapulo nga suliran nga mao ang kahusay ug kalinaw ug kriminalidad nga naghinay-hinay na usab og hulga sa mga kabarangayan.
